Kuvendi i Kosovës do të mblidhet më 29 shtator për të mbajtur seancën e radhës plenare, por sërish në rend dite nuk do të jetë projektligji për shënjimin e kufirit me Malin e Zi.
Pas mbledhjes së Kryesisë, u konfirmuan qëndrimet e kundërta që vazhdojnë të mbajnë partitë në pushtet dhe ato opozitare për Demarkacionin.
Kryekuvendari Kadri Veseli pas mbledhjes së kryesisë ka provokuar opozitën duke thënë se në momentin që qeveria e dërgon në kuvend projektligjin për Demarkacionin, ai do të votohet.
Por, opozitarët janë të bindur se projektligji në fjalë është i vdekur.
Kryetari i grupit parlamentar të AAK-së, Pal Lekaj, i cili ishte i pranishëm në mbledhjen e kryesisë, tha se Kosova është çliruar nga një ankth, meqë demarkacioni nuk është në rend dite.
“Mendoj që Qeveria ka hequr dorë nga ky version dhe mu për këtë nuk po e shihni në rend dite. Versioni i demarkacionit është i vdekur”, ka deklaruar deputeti Lekaj.
Ndryshe, në seancën e së enjtes do të mbahen dy interpelanca ku kryeministri Isa Mustafa, sipas kërkesës së deputetit Visar Ymeri, i mbështetur edhe nga 7 deputetë nënshkrues, do të përgjigjet në lidhje me kodin telefonik shtetëror të Republikës së Kosovës, si dhe interepelanca tjetër e kërkuar po nga deputeti i VV-së Ismail Kurteshi ku kryeministri do të raporton në lidhje me situatën aktuale politike në pjesën veriore të Republikës së Kosovës.
