Qeveria e Kosovës ka miratuar raportin e komisionit për matjen e territorit, por nuk ka treguar se kur do ta procedojë në Kuvend për ratifikim.
Kryetari i komisionit, Hivzi Islami në mbledhjen e qeverisë përsëriti tashmë qëndrimin e njohur se Kosova nuk humb asnjë metër territor me demarkacionin me Malin e Zi, duke thënë se komisioni s’ka pasur mandat të bëjë kufij të ri, por thjesht me metoda shkencore të bëjë matjen e territorit.
Duke aluduar në deputetin e LDK-së Shpejtim Bulliqi e Florim Isufin, të dy gjeografë, Islami tha se “dy studentët e tij ia futën barutin Kosovës”, derisa shtoi se “injorantët e keqpërdorën shkencën dhe u vunë në shërbim të politikave ditore”.
Ndërsa prezantonte raportin, kryeakademiku Islami tha se komisioni pati përgjegjësi të madhe dhe punoi pa ndikime politike.
“Por gjatë punës pati shantazhe ndaj anëtarëve, njëri prej të cilëve, u detyrua të japë dorëheqje në fund të procesit”, tha ai.
Se territori i shtetit nuk cenohet me këtë demarkacion, kanë thënë edhe kryeshefi i Agjencisë së Pyjeve, Ahmet Zejnullahu dhe ai i AKP-së.
Ministri i jashtëm, Enver Hoxha, e cilësoi punën e komisionit si kredibile e serioze, teksa tha se puna e tij është në rrjedhën e burimeve ndërkombëtare.
Por, mendim më ndryshe se bashkëpartiaku i tij shprehu zv.kryeministri Hajredin Kuçi, i cili tha se për Demarkacioninka nevojë për një konsensus edhe me spektrin tjetër politik, pos koalicionit qeveritar rreth kësaj çështjeje, për çka nuk dha votën pro për punën e komisionit. /tesheshi.com/
