Nga Blendi Gashi
Emërimi i kreut të Akademisë së Shkencave dhe Arteve, Hivzi Islami, për ta drejtuar komisionin që do ta bëjë matjen e territorit, në opinioin publik kosovar, po cilësohet jo vetëm dështim që në start por edhe tallje e re e qeverisë.
Arsyeja kyçe është se kryeakademiku kosovar dihet botërisht që gjatë gjithë kohës ka mbajtur anën e mazhorancës sa i përket marrëveshjes për demarkimin e kufirit, derisa ka goditur në vazhdimësi ata që kanë kundërshtuar këtë marrëveshje.
Ndonëse Islami dje tha se komisioni që do drejtojë ai “do të qëndrojë larg ndikimeve politike”, më pas gjatë fjalës së tij tregoi “fytyrën” e tij duke hedhur kritika në drejtim të partive opozitare dhe ekspertëve të pavarur.
“Mjerisht sot vërehet një boshllëk, se si duket ftesës së kryeministrit nuk u janë përgjigjur pozitivisht disa subjekte, pikërisht ato subjekte dhe ata individë të cilët kanë ngreh dyshime se Kosova po humb territor. Këtu është rasti që të debatohet dhe të ballafaqohen të dhëna dhe argumente ‘pro’ apo ‘contra’, midis profesionistëve pa i dhuruar askujt asnjë centimetër territor”, tha ai.
Kjo goditje e menjëhershme e tij ndaj opozitës, si dhe animi nga kryeministri, tregon qartë se komisioni që do udhëheqë Islami, i themluar me urdhër të Mustafës ka qëllimin e vetëm, që në fund të japë vetëm një rezultat, pra të njëjtë siç dha komisioni “Meha”, se Kosova nuk humb tokë me marrëveshjen për Demarkacion.
Për më tepër, vendimi i Mustafës që t’ia besojë “shefit” të tij të Akademisë drejtimin e komisionit, mund të cilësohet një hakmarrje ndaj rivalëve të tij partiakë e jo vetëm.
Islami, në debatin e 3 gushtit ironizoi keq ndaj ekspertëve Shpejtim Bulliqi e Florim Isufi kur pohoi se “studentët e mi brenda natës janë bërë ekspertë”.
Ndërsa në një intervistë të dhënë më pas për mediat kosovare, i fyu rëndë të dy, duke i quajtur diletantë, gënjeshtarë dhe plagjiatorë.
“A ka matur tokë ndonjëherë kryeakademiku Islami?”
Por nuk ka qëndruar në heshtje Bulliqi, duke iu drejtuar atj dhe opinionit me një pyetje serioze:
“Pyesni Hivzi Islamin se a ka matur tokë ndonjeherë në jetën e vet?”
Ndërsa analisti politik, Astrit Gashi, ka zgjedhur ta ironizojë kryeakademikun Islami.
“Tash masi e paska marrë në udhëheqje komisionin, Akademia e Shkencës, paska me u kry Demarkacioni. Mali i Zi sa për ta mundet, që ka qef (po ai fatmirësisht nuk ka), me na ardhë deri në Prishtinë. Momenti i fundit është me u zhvesh lakuriq edhe ky institucion- që veç i shkencës nuk është- por i politikës”, ka shkruar Gashi në Facebook.
Ideja për këtë komision erdhi para disa javëve meqë një marrëveshje për demarkacionin e kufirit me Malin e Zi e nënshkruar në gusht të vitit 2015, nuk është ratifikuar ende në Kuvend në mungesë të mbështetjes nga ana e deputetëve. /tesheshi.com/
