Zëra nga opozita kosovare vijojnë t’i qëndrojnë pozicionit se Kosova nuk duhet të falë tokë në këmbim të vizave; pra që e kundërshtojnë marrëveshjen e Demarkacionit me Malin e Zi, edhe me këtë çmim.
Numri dy i AAK-së, Ahmet Isufi, tha se versioni i paraqitur i Demarkacionit, është i papranueshëm për popullin e Kosovës, ngase vendi humb pjesë të territorit. Dhe ai, më tepër se kusht, liberalizimin e vizave nga ana e Brukselit e quan edhe presion, duke marrë shkas nga trysnia e ushtruar mbi disa deputetë për ta votuar atë.
“Nuk mund të falet toka, për presione të ndryshme, pasi që një gjë të tillë, nuk do ta lejonte asnjë popull. Qytetarët e Kosovës nuk mund të falin tokë për hir të lëvizjes së lirë”, tha zëvëndësi i Haradinajt në parti.
E pos nga opozita, zërat kundër Demarkacionit vijojnë të vijnë edhe nga mazhoranca kosovare. Deputeti i LDK-së, Shpejtim Bulliqi, i njohur për qëndrimin e tij të ashpër kundër marrëveshjes, mbajti një qëndrim tjetër sa i përket vizave. Sipas tij, kushti europian nuk është vënë për Demarkacionit, por për krimin dhe korrupsionin./tesheshi.com/
