Nga Blendi Gashi
Edhe pse ndoshta shumë pak e kanë pritur, Kryesia e Kuvendit të Kosovës dje vendosi që më datë 1 shtator të mbahet seanca plenare, ku do të jetë në votim ratifikimi ose jo i marrëveshjes për shënjimin e kufirit me Malin e Zi.
Kështu deputetët kosovarë pasi të përfundojnë pushimet, para vetës kanë për të marrë një vendim të rëndësishëm që pritet të ndikoj drejtëpërdrejt edhe në situatën e sigurisë në vend.
Por, para se të vendosin, ligjvënësit kosovarë kanë kohë të mendojnë saktësisht tre javë dhe më pas të votojnë pro apo kundër.
Marrëveshja e Demarkacionit e cila po kundërshtohet nga partitë opozitare, deputetë e së cilës kanë thënë se nuk do ta votojnë, si dhe nuk do kursejnë metoda për kundërshtimin e saj, pritet të mos votohet edhe nga disa deputetë të partive në pushtet, ndërsa disa të tjerë ende nuk kanë vendosur se si do të veprojnë.
Nga 120 deputetë sa ka institucioni ligjvënës kosovar, marrëveshja me Malin e Zi duhet të votohet me 2/3 e deputetëve apo mbi 80 vota.
Pas kundërshtimeve afër një vjeçare nga opozita, protestave, e debateve të shumta “pro et conta” Demarkacionit, janë të zgjedhurit e popullit ata të cilët do të thonë fjalën e fundit me votën e tyre.
Partitë opozitare, Lëvizja Vetëvendosje në njërën anë dhe AAK e NISMA për Kosovën në anën tjetër me konferencat e ndara që mbajtën dje deklaruan se do të kundërshtojnë fuqishëm ratifikimin e Demarkacionit, për çka paralajmëruan pushtetin se nuk do të kursejnë asnjë veprim për ta ndalur këtë marrëveshje të cilën ata e quajnë të dëmshme.
Ndërsa, partitë në pushtet u kanë bërë thirrje të gjithë deputetëve të japin votën e tyre pro, në anën tjetër opozita në vazhdimësi ka ftuar ligjvënësit të mos e votojnë këtë marrëveshje sepse i falin tokë malazezëve.
Kryeministri, Isa Mustafa, ka thënë se është përgjegjësi e deputetëve të marrin vendim, porse, sipas tij, do t’ua kërkojnë që ta votojnë këtë marrëveshje.
Kurse, lideri i AAK-së, Ramush Haradinaj dhe kreu i NISMA-s Fatmir Limaj, në një konferencë që mbajtën të mërkurën u bën bërë thirrje deputetëve të mos e votojnë marrëveshjen, sepse vota e tyre pro, mund të krijon krizë në vend.
Por, seanca e 1 shtatorit do të tregoj saktësisht se cila thirrje, ajo e pozitës apo opozitës do të triumfojë, kur 120 deputetët do të vendosin për fatin e Demarkacionit.
Ja deputetët e partive në pushtet që do të votojnë kundër Demarkacionit
Siç dihet Demarkacionit përveç deputetëve opozitarë do t’i thonë jo edhe disa deputetë të partive në pushtet, PDK-së e LDK-së, e Lëvizjes për Bashkim.
Shpetim Bulliqi nga LDK, Rifat Qela nga Lëvizja për Bashkim dhe Shaip Muja nga PDK kanë thënë se do të votojnë kundër Demarkacionit.
Votën kundër e kanë deklaruar edhe deputetët e pavarur, Gëzim Kelmendi, kryetar i Lëvizjes FJALA dhe deputeti Ramiz Kelmendi.
Nga ana tjetër ka disa deputet nga LDK e PDK, të cilët ende nuk kanë vendosur nëse do të votojnë pro ose kundër kësaj marrëveshje.
Deputetja më e zëshme e LDK-së Vjosa Osmani dhe deputeti tjetër i kësaj partie, Arben Gashi ende nuk kanë vendosur nëse do të votojnë për apo kundër.
Poashtu mbetet e paqartë ende vota e tjerë e deputetëve të LDK-së, Adem Salihaj, Fatmir Rexhepi, Anton Quni, Besa Gaxheri e Hatim Baxhaku.
As deputeti i pavarur, Ilir Deda, nuk dihet se si do të votojë edhe pse ai ka shprhur mendimin kundër marrëveshjes.
Poashtu, nuk dihet saktë se si do të votojnë edhe tre deputetët e PDK-së, Xhavit Haliti, Adem Grabovci, Besim Beqaj e Nait Hasani të cilët kanë shprehur shqetësimet e tyre për marrëveshjen në fjalë.
Nëse përveç deputetëve që kanë treguar se do të votojnë kundër, njëjtë votojnë edhe deputetët tjerë të partive në pushtet të cilët ende janë në mëdyshje, del se koalicioni PDK – LDK nuk i ka numrat për ratifikimin e kësaj marrëveshjeje.
Por, duke parë që deri në ditën e seancës janë edhe tre javë, nuk përjashtohet mundësia që ndaj deputetëve të caktuar të bëhet presion dhe në fund ata të ndryshojnë qëndrim dhe koalicioni qeverisës PDK-LDK, të siguroj mbi 80 vota të nevojshme për ratifikimin e Demarkacionit me Maline Zi. /tesheshi.com/
