Nga Blendi Gashi
Qeveria me në krye Ramush Haradinajn e ka kryer punën sa i përket marrëveshjes së Demarkacionit me Malin e Zi, e mbetur pezull prej dy vitesh, pasi e ka proceduar në Kuvend dhe i mbetet tashmë këtij të fundit që të vendos se kur do jetë në rend dite, por vet kryeministri nuk e ka thënë asnjë fjalë për të gjeturat e komisionit që formoi vet.
Ashtu siç pritej, njeriu i Haradinajt, ish-deputeti i LDK-së Shpejtim Bulliqi, tha se komisioni i kaluar në krye me Murat Mehën ka gabuar duke caktuar vijë të pasaktë kufitare, pra jo në përputhje me vijën administrative të ish-Krahinës Autonome të ish-Jugosllavisë, duke daleëhapur kështu kundër versionit që përkrahet nga Hashim Thaçi e Kadri Veseli.
Se puna e Bulliqit nuk ka mbështetjen e PDK-së, e tregoi edhe zv.kryeminsitri nga kjo parti, Enver Hoxhaj, i cili ja tha në sy njeriut të Haradinajt, por edhe këtij të fundit, se komisioni nuk prezentoi asnjë të gjetur të re.
“Dëgjova shumë vlerësime të përgjithshme por jo ndonjë fakt apo dëshmi konkrete. Nuk ishit konkret, nuk pash ndonjë qartësi të re. Kur temat janë komplekse, politika dhe komisionet duhet ti thjeshtësojnë ndërkaq ju sot e keni komplikuar edhe më shumë. Ne si qeveri do ta dërgojmë këtë raport në Kuvendin e Kosovës, por kam pritur gjetje të reja konkrete. E kam përshtypjen se sot nuk na keni ofrua fakte. Unë sot dal prej kësaj mbledhje të qeverisë me një qartësi më të vogël se sa ajo që kam pritë”, tha Hoxhaj, duke lënë të nënkuptohet se votat e PDK-së do janë “pro” vetëm për versionin e parë, pra të komisionit “Meha”.
Thaçi fton deputetët ta votojnë marrëveshjen, s’flet për të gjeturat e Bulliqit
Për vërejtjet e Bulliqit nuk e ka thënë asnjë fjalë as presidenti Hashim Thaçi, i cili vetëm i është gëzuar dërgimit të kësaj marrëveshjeje në Kuvend duke kërkuar që të miratohet, sigurisht version i parë.
“Ratifikimi i marrëveshjes për shënimin e vijës kufitare ndërmjet Republikës së Kosovës dhe Malit të Zi i jep fund izolimit të vendit tonë, duke mundësuar heqjen e regjimit të vizave, por edhe e forcon subjektivitetin ndërkombëtar të shtetit tonë. Me vendimin e sotëm të qeverisë merr fund saga e debateve shterpe akademike, e cila duke mos sjellë asnjë argument të ri, për tri vite me radhë ka prolonguar izolimin e qytetarëve të vendit, duke shkaktuar konfuzion dhe frikë se kinse Kosova rrezikon të humbet territor. Tani është koha që Kuvendi i Republikës së Kosovës të marrë vendimin e vet meritor në interes të qytetarëve të vendit, të cilët me durim të pashembullt janë duke pritur me vite të tëra heqjen e vizave, respektivisht heqjen e izolimit”, ka shkruar Thaçi në Facebook.
Ja pse nuk përfundon asgjë me dërgimin e marrëveshjes në Kuvend
Dërgimi i kësaj marrëveshje në Kuvend paraqet vetëm një obligim të kryer nga qeveria, por definitivisht nuk zgjidh asgjë.
Krejt loja tashmë është shndërruar në Kuvend ku PDK e LDK, edhe pse tashmë “armiq”, mbrojnë versionin “Meha”, ndërsa Vetëvendosje mbetet e palëkundur se nuk duhet të ratifikohet marrëveshja, qëndrim që mbahet aktualisht edhe nga AAK e NISMA.
Vetëvendosje, përmes përfaqësuesve të saj ka bërë të ditur se kurdo që marrëveshja të vjen në Kuvend, ata do ta kundërshtojnë; por siç kanë thënë këtë herë, me vota sepse nuk ka arsye të ndërmerren veprime të tjera pasi ekzekutivit i duhen edhe 20 vota të opozitës për ta kaluar.
Ndërsa LDK e Isa Mustafës po i bën presion Haradinajt duke thënë se ai duhet të dëshmojë se kufiri është në Çakorr dhe Zhlep, për t’ia dhënë votat e partisë së tyre; në të kundërtën nuk japin vota për versione të reja.
Andaj, duke parë se PDK nuk do të pranojë që marrëveshja e nënshkruar nga lideri i tyre historik Thaçi të quhet e gabuar, e që njëkohësisht kauza e Haradinajt do quhej e drejtë, situata mbetet e mjegulluar ku nuk pritet të ketë një epilog të qartë, e ku nuk është e çuditshme që Ramushin ta përcjellë fati i Isës dhe, në një moment PDK ta rrëzojë nga pushteti.
Sidoqoftë, fjalën përfundimtare rreth Demarkacionit pritet që ta japë Kuvendi, ku ratifikimi i marrëveshjeve ndërkombëtare bëhet me dy të tretat e votave të deputetëve, apo 80 vota për nga 120 deputetë sa janë gjithësejt. /tesheshi.com/
