Nga Blendi Gashi
Pas një viti të plotë përplasje mes pozitës dhe opozitës, Kuvendi i Kosovës sot do të vendos përfundimisht nëse do të votohet apo jo projektligji për ratifikimin e shënjimit të kufirit me Malin e Zi.
1 shtatori 2016-të, për dallim nga “1 shtatorët” e tjerë nuk do të jetë ditë e çeljes së shkollave, por pritet të jetë një ditë me mjaft tensione.
Pra, 1 shtatori i 2016-tës do të jetë përballje mes pozitës dhe opozitës brenda instucionit të Kuvendit, ku veçanërisht deputetët e Lëvizjes Vetëvendosje do të kundërshtojnë fuqishëm ratifikimin e Demarkacionit, si dhe do të jetë ditë proteste, me sinjale të tenisoneve të mëdha, pasi VV ka ftuar aktivistët e saj nga mbarë Kosova që të mblidhen në shesh, siç thonë, për ta ndalur ratifikimin e marrëveshjes në fjalë.
Plani i policisë…
Duke parë se situata mund të eskalojë, policia e Kosovës ka ditë që për rreth ndërtesës së Kuvendit të Kosovës dhe qeverisë ka shtuar forcat duke patrulluar dhe ruajtur objektet e këtyre dy institucioneve.
Në hyrje të Kuvendit të Kosovës gjatë ditës së djeshme është parë edhe Njësia Speciale e Policisë së Kosovës, që po bënte sigurinë e objektit, derisa edhe KFOR-i ditë më parë përmes drejtuesve të saj është shprehur i gatshëm të ofrojë siguri nëse një gjë e tillë i kërkohet.
Portali tesheshi.com ka kontaktuar me zyrën për informim të policisë, për çka këta të fundit kanë thënë se janë të gatshëm për të menaxhuar çfarëdo situate që krijohet, por nuk kanë treguar nëse do të shtojnë numrin e zyrtarëve policorë për protestën e sotme.
Zyra për informim e policisë thotë se “detyrat dhe përgjegjësitë e policisë së Kosovës janë të përcaktuara qartë me ligj dhe të gjitha veprimet e saj i ndermerr dhe do t’i ndërmerr bazuar në ligj dhe Kushtetutë të vendit, duke pas si objektiv gjithnjë garantimin e rendit dhe sigurisë, zbatimin e ligjshmërisë në Republikën e Kosovës duke pas parasyshë edhe respektimin e të drejtave njerëzore si e drejtë e garantuar”.
Policia, në një përgjigje për tesheshi.com thotë se “për menaxhim të situatës së sigurisë dhe garantim të levizjes së lirë për qytetarë apo qarkullimit të rrjedhshëm në trafik angazhon kapacitete të mjaftueshme permes planeve fleksibile operacionale, për të garantuar sigurinë dhe është e përgaditur për tu ballafaquar me çfarëdo situtate që mund të paraqitet”.
“1 shtatori, ditë e dhunshme ose fillim i një cikli dhune”
Për ekspertin e sigurisë, Burim Ramadani, dita e sotme, mund të jetë një ditë e dhunshme ose fillim i një cikli dhune, por sipas tij e gjitha varet se çfarë përgjigje do t’i jep Kuvendi i Kosovës çështjes së Demarkacionit.
“Normalisht, i tërë ky proces ka mundur të menaxhohet, por fatkeqësisht nuk ka pasur as pëpjekje minimale për ta menaxhuar situatën.
Për më shumë se 14 muaj, procesi i demarkacionit ka mundur të rishikohet jo një herë, por saherë që ka qenë e nevojshme deri në përfundimin e kundërshtimeve të këtilla.
Sidoqoftë, tashmë rreth 6 muaj kanë filluar akte të ndryshme dhune, kryesisht të nivelit më të ulët të rrezikut të sigurisë. Porse, në muajin gusht ka pasur sulme me mjete shpërthyese dhe të rënda. Madje, këto vetëm janë shpeshtuar.
Për më keq, këto akte dhune kanë vetëm mesazhin e paralajmërimit për shkallën e dhunës që po vjen. Kështu që, krejt panevojshëm, por seanca për Demarkacionin është kthyer në një seancë që do të ndikojë nëse do të jetë vetëm një ditë e dhunshme apo nëse ajo ditë do të jetë fillimi i një cikli dhune”, thotë eksperti Ramadani.
Ndryshe, Kuvendi i Kosovës në ora 11:30 do të mbajë seancën e rregullt plenare, ku projektligji për Demarkacionin me Malin e Zi do të jetë pika e katërt e rendit të ditës. /tesheshi.com/
