Pas shtyrjes së projektligjit për ratifikimin e marrëveshjes për demarkacionin e kufirit me Malin e Zi, kryeministri Isa Mustafa ka paralajmëruar se do të nisë një raund takimesh me opozitën dhe listën Serbe për sqarimin e të gjitha dilemave. Bisedimet do të nisin përpara risjelljes në Kuvend të projektligjit për Demarkacionin.
Këto komente, kreu i Ekzekutivit kosovar i bëri sot pas ceremonisë së ndarjes së shpërblimeve për komunat, të organizuar nga ministria e Administrimit të Pushtetit Lokal dhe projekti DEMOS.
“Do të bisedoj edhe me opozitën, Aleancën për Ardhmërinë e Kosovës, Nismën dhe Vetvendosjen. Po ashtu, do të bisedojmë edhe me listën Serbe para se të procedojmë më tutje në mënyrë që t’i shterim të gjitha opcionet”, theksoi Mustafa.
Ai përjashtoi mundësinë që të pranojë kushtëzime qoftë nga Lista Serbe apo opozita. “Nëse ka diçka që na kushtëzohet unë do ta bëjë publike. Nuk ka kushte as nga Lista e as nga të tjerët, por ne do të mundohemi që këtë çështje ta zgjidhim në bazë të fakteve dhe argumenteve”, është shprehur Mustafa.
Njëherësh, Mustafa tha se do ta diskutojë edhe çështjen e banorëve të cilët e kanë shfrytëzuar zonën e diskutueshme për kullota, në mënyrë që, sipas tij, të zgjidhen të gjitha problemet dhe shqetësimet e ngritura. /tesheshi.com/
