Kjo mesjavë pritet t’i japë zgjidhje përfundimtare çështjes së Demarkacionit, vijës kufitare të Kosovës me Malin e Zi, që është vënë dhe si kriter nga Perëndimi për liberalizimin e vizave.
Do jetë e mërkua ose e enjtja, dita kur do të mbahet seanca për të vendosur me votë ratifikimin apo jo të kësaj marrëveshjeje, por që me gjasë do jetë “po”. Këtë e ka bërë të ditur kundërshtari më i flaktë i saj, kryeministri Haradinaj, gjatë një mbledhjeje të qeverisë të mbajtur sot ku u tërhoq projektligji i vjetër me qëllim të përfshirjes në ligj të marrëveshjes së dy presidentëve, atij të Kosovës dhe Malit të Zi.
“Që nesër jemi të gatshëm për seancë. Me siguri seanca do të thirret ose nesër ose pasnesër. Pasnesër gjithqysh se nuk kemi mundësi me prit më shumë. Gjasa më të vogla ka nesër mu thirr”, tha Haradinaj.
Ai tha se tashmë ka argumente të qëndrueshme për deputetët që ta votojnë, pasi marrëveshja parasheh rishikimin dhe korrektimin.
Projektligji u tërhoq me të gjithë që votuan pro, përpos tri abstenimeve nga komuniteti serb. Sa i përket abstenimit të përfaqësuesve serbë në Qeveri për tërheqjen e projektligjit nga Kuvendi, Haradinaj tha se ishte shenjë e mirë që ata ishin prezent në takimin e qeverisë. /tesheshi.com/
