Nga Blendi Gashi
Shenjimi aktual i kufirit me Malin e Zi ka qenë një nga arsyet kryesore për bllokimin prej tre muajsh të punimeve të Kuvendit të Kosovës nga subjektet politike në opozitë.
AAK e Ramush Haradinajt ka qenë partia e parë që ka ngritur zërin kundër çështjes së Demarkacionit duke shprehur brengën e tyre se me marrëveshjen e arritur Kosova humb mbi 8 mijë hektarë.
Këtij shqetësimi më pas i janë bashkangjitur edhe nga dy partitë tjera opozitare VV dhe NISMA për Kosovën, si dhe ekspertë të ndryshëm të fushës.
Por, përkundër këtyre shqetësimeve Departamenti amerikan i Shtetit thotë se Demarkacioni është në përputhje me Kushtetutën dhe nuk cenon integritetin territorial.
DASH thotë se “e kupton se bazë për demarkacion, Komisioni ka shfrytëzuar Kushtetutën Jugosllave të vitit 1974, e cila ka definuar kufijtë e Kosovës nga kufijtë administrativë të komunave, të ndara në zona kadastrale”.
“Kjo bazë e shenjimit është shfrytëzuar gjithashtu edhe në Propozimin Gjithëpërfshirës të të Dërguarit të Posaçëm të Kombeve të Bashkuara, Marti Ahtisaari, më 2007 dhe në Kushtetutën e Republikës së Kosovës më 2008”.
“Pas shqyrtimit të hartave nga vitet 1940-ta e deri më tash, përfshirë këtu edhe ato që janë shfrytëzuar nga komisioni për demarkacionin e kufirit, Departamenti Amerikan i Shtetit ka përcaktuar se kufiri i shenjuar së voni është në përputhje të ngushtë me Kushtetutën e vitit 1974. Kufijtë që ne i kemi përshkruar që nga viti 2008, përputhen në detaje me kufirin e propozuar në vitin 2015”, thuhet në komunikatën e DASH.
Më tej thuhet se me shënimin se përfundimi i marrëveshjes për demarkacionin e kufirit është një kusht i Bashkimit Evropian për liberalizimin e vizave dhe është një hap i rëndësishëm në rrugëtimin e Kosovës drejt integrimeve evropiane.
AAK: Demarkacioni edhe pse një prej kushteve, s’duhet të bëhet ‘shkel e shko’
Anëtari i Kryesisë së AAK-së, Muharrem Nitaj, thotë se nuk e di se çfarë sakt ka thënë dhe çfarë përmban ekspertiza e DASH, por e di që një numër jo i vogël i ekspertëve të vendit, të papërfshirë në parti politike, kanë gjetur parrëgullësi të mëdha në shënjimin e kufirit me Malin e zi. Ai në një prononcim për portalin tesheshi.com thotë se për më tepër edhe vet Mali i zi, ka shprehur gatishmërinë qëtë korrigjohen gabimet. “Jemi të vëtdijshëm se demarkacioni është njëri prej kushteve, për proceset integruese, por kjo nuk nënkupton se demarkacioni duhet të bëhët “shkel e shko”.
Qeveria e vendit duhet të caktoi një komision kredibil, duke pasur edhe ekspertë ndërkombëtar, në mënyrë që t’i vë pikë kësaj çështjeje. Askush nuk duhet të frikësohet nga një proces i detajuar i demarkacionit me Malin e zi, sepse gabimet gjithmonë janë të mundshme dhe në rastin konkret, është evidente se ato janë bërë”, ka deklaruar Nitaj për tesheshi.com.
Analisti politik, Blerim Burjani, thotë se çështja e Demarkacionit nuk duhet të jetë çështje për të fituar poena politik nga partitë në të dyja shtetet.
“Kufijtë nuk janë politik por teknik dhe pasqyrim i jeteses së dy popujve bazuar në historinë kadastrale. Kufijtë nuk caktohen nga partitë politike as në Kosovë as në Mal të Zi, andaj nuk duhet të ketë politik dhe luftë politike për pushtet nën çështjen e demarkacionit”, thotë Burjani, për tesheshi.com.
Ndryshe, Qeveria e Malit të Zi ka shprehur gatishmëri për rishqyrtimin e kufirit meKosovën.
/tesheshi.com/
