Nga Blendi Gashi
Qeveria e Kosovës ka paralajmëruar se së shpejti do ta procedojë në Kuvend projektligjin për shënjimin e kufirit me Malin e Zi, menjëherë pasi të fillojë sesioni vjeshtor.
Megjithatë, qeveritarët kosovarë nuk kanë dhënë një datë të saktë se kur mund ta marrë një vendim të tillë qeveria “Mustafa”, por paralajmërojnë se së shpejti do të ndodh një gjë e tillë, siç thonë për shkak të proceseve të rëndësishme që e presin vendin.
Zv. ministri dhe këshilltari i kryeministrit, Bajram Gecaj, thotë se nuk ka kohë të caktuar, por për shkak të proceseve të rëndësishme si rasti i liberalizimit të vizave, duhet të rikthehet në Kuvend sa më parë që të jetë e mundur.
“Besoj pas konsultimeve në ditët e ardhshme në mes të partnerëve të koalicionit”, ka thënë Gecaj për portalin tesheshi.com.
Demarkacioni s’mund të kalojë me këtë koalicion
Por, analistët politik nuk e shohin të rrugës insistimin e qeverisë për ratifikimin e kësaj marrëveshje.
Ata paralajmërojnë se koalicioni qeveritar vështirë se mund t’i bind deputetët e tyre që janë kundër versionit aktual të marrëveshjes ta votojnë atë, derisa paralajmërojnë se kjo marrëveshja e ndjeshme do të duhet të ratifikohet nga një qeveri e re.
Islam Krasniqi, njohës i rrethanave politike, nuk e beson se qeveria “Mustafa” do të mund të arrijë që ta ratifikon marrëveshjen e Demarkacionit, pasi në njërën anë nuk i ka numrat dhe në anën tjetër presionin publik.
“Marrëveshja e Demarkacionit besoj që do të ratifikohet nga një qeverie e re, pasi që t’i rishikon dhe vërteton faktet konkrete të cilat e tregojnë të vertetën rreth vijës kufitare me Malin e Zi.
Kjo marrëveshje mund të dërgohet për shqyrtim edhe në Komisionin e Venecias, sepse Bashkimi Evropian po na kushtëzon me liberalizimin e vizave.
Qeveria si ka numrat për ratifikim, gjersa Mali i Zi e ka ratifikuar dhe nuk pranon që të rishikohet edhe një herë, gjë që obligohemi që zgjedhja të gjindet vetëm nga vendimi i Komisionit të Venecias!”, thotë Krasniqi, për tesheshi.com.
Ibrahim Gashi, ish zyrtari i lartë i AKR-së së Behxhet Pacollit, ka deklaruar se koalicioni qeverisës PDK – LDK e ka të vështirë të krijojë një konsensus për ta votuar versionin aktual të marrëveshjes së demarkacionit me Malin e Zi.
“Mendoj se ky koalicion e ka të vështirë të krijojë një konsensus për ta votuar këtë version të marrëveshjes. Nëse kjo do të ishte e domosdoshme që të ndodhte patjetër, atëherë gjykoj se zgjedhjet do të ishin si opsion. Por, nëse kjo marrëveshje edhe mund të presë, atëherë mbase zgjedhjet nuk do të ishin të domosdoshme”, ka thënë ai, në një intervsitë dhënë për mediat kosovare.
Se mazhoranca nuk i ka numrat për ta kaluar marrëveshjen për demarkimin e kufirit disa herë janë shprehur edhe deputetë të tri partive opozitare Vetëvendosje-s, AAK-së e NISMA-s, për portalin tesheshi.com duke thënë se kjo marrëveshje nuk do të ratifikohet dhe se koalicioni qeveritar PDK-LDK nuk ka mandat të vazhdoj të insistoj në miratimin e marrëveshjes në fjalë.
Ndryshe, në seancën e së enjtes kryeministri Isa Mustafa tërhoqi projektligjin për Demarkacionin, duke thënë se një grup parlamentar ka kërkuar koncesione si kusht për ta votuar Demarkacionin. /tesheshi.com/
