Nga Blendi Gashi
Ratifikimi i Demarkacionit me Malin e Zi sërish është bërë temë kryesore në Kosovë, pas një heshtje disa javëshe. Arsyeja është se ratifikimi i kësaj marrëveshjeje është kushti kryesor që Këshilli i Bashkimit Evropian dhe Parlamenti Evropian ta miratojë liberalizimin e vizave, e që pritet të ndodh brenda 90 ditësh.
Në rast se Kosova nuk e përmbush këtë kriter të kërkuar nga BE, kjo e fundit ka paralajmëruar se rekomandimi pozitiv për vizat mund të kthehet në pikën zero.
Një gjë të tillë e ka paralajmëruar ministri aktual i Integrimeve Evropiane, Bekim Çollkau, i cili ka thënë se nëse nuk ratifikohet kjo mund të shërbej si arsyetim dhe alibi për Parlamentin Europian dhe për Këshillin e Bashkimit Europian që të mos e jap pëlqimin e vetë, miratimin e vetë për zbatimin dhe hyrjen në fuqi të rekomandimit të dhënë të Komisionit Europian.
“Në qoftë se shkon për ratifikim dhe nuk ratifikohet atëherë duhet të rifillojmë nga zeroja përsëri”, ka deklaruar Çollaku, për mediat kosovare.
Përkundër këtij paralajmërimi të BE-së, por edhe të ministrit Çollaku, partitë opozitare në Kosovë edhe pse janë thyer mes vete kanë paralajmëruar se nuk do të lejojnë që marrëveshja për Demarkacionin të ratifikohet edhe nëse rrezikohen vizat.
Por, kryeministri kosovar, Isa Mustafa, ka thënë se Demarkacioni duhet të zgjidhet sa më shpejt se nuk ka afat shumë të madh pasi që vjen koha e pushimeve të parlamentit.
“Që nga java e ardhme do të bisedoj me kryetarin e parlamentit dhe me presidentin dhe do të zgjedhim kur do të bëhet procedimi. Janë vërejtje që mund të ratifikohen. edhe pala malazeze ka deklaruar se nesh ka ndodhur ndonjë gabim do të përmirësohet. Nuk ka asgjë për tu shqetësuar”, ka thënë Mustafa.
Opozita: Do ta kundërshtojmë fuqishëm ratifikimin e demarkacionit
Partitë opozitare Vetëvendosje, AAK-ja e NISMA për Kosovën thonë se janë të vendosur ta ndalojnë ratifikimin e e marrëveshjes së demarkacionit me Malin e Zi, për çka nuk e mohojnë rikthimin e gazit lotsjellës në Kuvend, pasi shprehen se nuk e lejojnë humbjen e 800 hektarëve tokë për asnjë çmim.
Edhe Aleanca për Ardhmërinë e Kosovës, e cila i ka prirë kësaj kauze opozitare, thotë se nuk do të marrë fare pjesë në seancë, kurdo që hidhet për votim ratifikimi i marrëveshjes.
Deputeti i AAK-së Daut Haradinaj thotë se Bashkimi Europian duhet ta pranojë Kosovën si sovrane dhe e quan të padrejtë ratifikimin e demarkacionit me Malin e Zi si kusht për lëvizjen e lirë të kosovarëve. Thotë se deputetët nuk duhet që me votën e tyre të heqin dorë nga territori i vendit duke ratifikuar këtë marrëveshje.
“Deputetët e Parlamentit te Kosovës nuk duhet dhe as nuk besoj që do e lejojnë që me votën e tyre të heqin dorë nga territori i Kosovës.
Nëse EU i duhet Isa & Kompani natyrisht që e japim, por unë besoj se ata duhet poashtu të jenë të interesuar që kufiri i Kosovës të caktohet drejt e pa ndërhyrje. Ky edhe ështē standard i BE-së”, ka shkruar Haradinaj, në Facebook.
Edhe partia e parë opozitare, Lëvizja Vetëvendosje thekson se me çdo kusht do ta kundërshtojnë ratifikimin e demarkacionit.
Deputetja e VV-së, Donika Kadaj-Bujupi e quan të papranueshëm kushtëzimin e lëvizjes së lire me ratifikimin e demarkacionit.
Ajo thotë se lëvizja e lire është një drejtë e mohuar për qytetarët e Kosovës tash e sa kohë.
“Si deputetë ne do të kundërshtojmë çdo përpjekje për të cenuar territorin e vendit tonë. Me gjithë forcën!”, ka thënë Kadaj-Bujupi, për tesheshi.com.
Ratifikimin e demarkacionit do ta kundërshton fuqishëm edhe partia më e vogël opozitare NISMA për Kosovën.
Deputetja e NISMA-s, Valdete Bajrami, thotë se subjekti i tyre do ta kundërshtoj ratifikimin e demarkacionit pasi nuk e sheh të nevojshme që Kosovës t’i vihet kusht për liberalizimin e vizave derisa nuk sqarohet qartë se ku po mbetetet vija kufitare.
“Do ta kundërshtojmë fuqishëm ratifikimin e demarkacionit. Do të diskutojmë të gjitha metodat dhe format për t’i kundërshtuar marrëveshjet e dëmshme të 25 dhe 26 gushtit. Kundërshtimi nuk do të thotë se bëhet vetëm me gaz dhe opozita do të jetë në seancë dhe në çdo mënyrë do ta kundërshtojmë ratifikimin e demarkacionit”, ka thënë deputetja Bajrami për tesheshi.com. /tesheshi.com/
