Nga Blendi Gashi
Pas dhjetë muajsh krize politike, tensioni e dhune në Kuvend një nga njerëzit më të fuqishëm të koalicionit qeverisës Adem Grabovci, shef i grupit parlamentar të Partisë Demokartike të Kosovës ka pranuar se kufiri me Malin e Zi është zhvendosur 5 kilometra më brenda territorit të Kosovës.
“E di ku ka qenë zona kufitare edhe në kohën e luftës ku e kemi hasur. Zona e mëhershme kufitare është në shpërpushje me versionin e Murat Mehës. Historikisht dihet se kufiri ka qenë në Kullë dhe diku pesë apo gjashte kilometra është tërhequr prapa në brendi të Kosovës”, ka thënë Grabovci.
Grabovci ka deklaruar se në kohën sa ishte zëvendësministër në Ministrinë e Transportit, kompanitë e kontraktuara vendore kanë bërë mirëmbajtjen e rrugës deri në Kullë.
Deputeti që vjen nga rajoni i Dukagjinit, nuk e ka përjashtuar mundësinë që çështja e Demarkacionit të shkojë në Gjykatën e Arbitrazhit, apo edhe të rinegociohet me shtetin malazez, nëse ka fakte që dëshmojnë se Kosova me vijën e re kufitare humb 8 mijë hektarë tokë.
Shefi i “shefave” siç njihet Grabovci me deklaratën e bërë ka dalë kundër ish shefit të tij të partisë Hashim Thaçi, presidentit aktual i cili në vazhdimësi bën thirrje që sa më parë të ratifikohet në kuvend shenjëzimi i kufirit me Malin e Zi.
Por këto deklarata kundërthënëse të njerëzve të PDK-së dhe zbutja e qëndrimit nga kryekuvendari Kadri Veseli se për Demarkacionin duhet të ketë unitet mes partive siç duket është një kurth mirë i ndërtuar kundër partnerit të koalicionit LDK-së për t’u divorcuar nga “martesa e zorit”.
Shtrohet pyetja pse Adem Grabovci nuk e ngriti zërin më herët por tani kur gjithnjë e më shumë flitet për një koalicion të ardhshëm mes partive të luftës PDK-së dhe AAK-së e NISMA-s ?
Ish deputet, njëherit zyrtar të LDK-së dhe analistët politik deklaratën e Grabovcit e shohin si fillim të fundit të koalicionit me PDK-në.
Naser Rugova, zyrtar i LDK-së thotë se deklarata publike e shefit të grupit parlamentar të PDK-së, se Mali i Zi ka hyrë 5kilometra në territorin e Kosovës, demanton qeverinë, komisionin qeveritar, dhe shkakton konfuzion edhe më të madh në popull.
“Unë këtë deklaratë e shoh si tendencë tërheqjeje nga përgjegjësia dhe fillimi i plasaritjeve serioze brenda partnerëve të koalicionit qeverisës. Ky mbase mund të jete fillimi i fundit të këtij koalicioni qeverisës”, thotë Rugova për tesheshi.com, ndërsa shton se dikush duhet të jap përgjegjësi çështjen e Demarkacionit.
Islam Krasniqi, thotë se koalicioni aktual asnjëher nuk ka funksionuar si një trup i vetëm, por gjithmonë ka pasur çarje brenda tij, mosmarrëveshje, dhe qëllime të kundërta sa që lehtë ka mundur të shkatërrohet
Krasniqi thotë se pozita e ka humbur fuqinë përballë opozitës lidhur me Demarkacionin sepse ju mungojnë numrat dhe pas afër një viti e treguan të vërtetën lidhur me pazarin që kanë bërë në dëm të vendit.
“Deklarata e shefit të PDK-së , Adem Grabovci për vijën kufitare tregon se këtij koalicioni i ka ardhur fundi dhe PDK mundohet që ta dobësojë sa më shumë LDK-në dhe të gjithë fajin t’ia mvesh kësaj partie edhe pse mashtrimin e kanë bërë së bashku. Radhitja e Grabovcit nga opozita lidhur me Demarkacionin dhe fushata e kryekuvendarit Veseli pa ndërprerë çdo ditë nëpër komuna ku takon biznese tregon se rrugët janë të ndara brenda koalicionit dhe tani vetëm duhet të përgatitemi për zgjedhje sepse ato nuk janë larg”, ka thënë Krasniqi, për tesheshi.com.
Arsim Haziri, njohës i rrethanave politike në vend thotë se duke e parë gjendjen e rëndë politike dhe pamundësinë për të ec më tej, koalicioni qeverisës është duke menduar të lëshoj pe, dhe kjo më së miri dëshmohet me deklarimet e bëra së fundmi nga krerët e PDK-së, konkretisht Adem Grabovci.
“Deklaratën e bërë nga Grabovci e shoh si vullnet politik për t’i ikur mundësisë për dërgimin ne kuvend të çështjes se Demarkacionit. LDK me partneritetin e lidhur me PDK-në ka rënë viktimë e saj”, thotë Haziri, për tesheshi.com.
/tesheshi.com/
