Kabineti i kryeministrit, Isa Mustafa, ende nuk e ka të ditur se kur do të procedohet marrëveshja për Demarkacionin me Malin e Zi për ratifikim në Kuvend. Për këtë çështje këshilltarët e tij së fundmi kanë dhënë deklarata kundërthënëse.
Bajram Gecaj, këshilltar i Mustafës ka thënë sot për media se Demarkacioni nuk pritet të procedohet në Kuvend nëse paraprakisht nuk janë të siguruara vota.
“Duhet me besu se e kemi numrin e caktuar të votave, sepse nuk ka logjikë qe të procedohet pa vota. Megjithatë në fund vendimi i takon krerëve të PDK-së dhe LDK-së”, ka thënë Gecaj.
Në anën tjetër, Sokol Havolli, shef i kabinetit të kryeministrit, javën e kaluar deklaroi në një debat televiziv se procedimi i Demarkacionit do të bëhet menjëherë posa të dalë raporti i komisionit për territorin dhe se nuk do të pritet nëse janë ose nuk janë votat e mjaftueshme.
“U mbetet deputetëve të votojnë ose jo për demarkacionin. Qeveria nuk do të pres më, do ta dërgojë në Kuvend dhe atje le të vendosin deputetët. Deputetët janë ata që duhet ta thonë fjalën e tyre, qeveria e ka kryer punën”, ka thënë Havolli, transmeton lajmi.net.
Ndryshe, komisioni për territorin pritet që nesër të përfundojnë diskutimin publik për raportin që u prezantua në fillim të kësaj jave ku do t’ia dërgoi qeverisë dhe më pas kjo e fundit do marrë vendimin se kur do e procedojë marrëveshjen në fjalë për në Kuvend.
Mediat kosovare raportojnë se 9 marsi është data më e mundshme për votimin e Demarkacionit, pasi sipas tyre një gjë të tillë e kanë kërkuar aleatët ndërkombëtarë. /tesheshi.com/
