Përkundër se Komisioni i ri i formuar nga Haradinaj ka dalë në teren dhe po bën matjet në kufi me Malin e Zi, siç duket nuk do ketë një zgjidhje të shpejtë të çështjes së Demarkacionit. Kjo pasi Komisioni Shtetëror, që tashmë drejtohet nga ish-deputeti i LDK-së Shpejtim Bulliqi, nuk ka caktuar ende një kohë se do të mund të dërgojnë një raport final në qeveri.
“Punën tonë ne do ta bëjmë sa më shpejt që është e mundur. Jemi duke punuar në mënyrë intensive, por datë dhe kohë të caktuar nuk mund të japim pa u përafruar i gjithë procesi”, thotë Bulliqi.
Ai ka bërë të ditur se po i shqyrtojnë dokumentet dhe faktet ekzistuese në lidhje me shënjimin e vijës së kufirit ndërmjet Kosovës dhe Malit të Zi.
“Aktualisht po punohet në tri segmente; në atë të analizimit të dokumentacionit nga komisioni i kaluar, hulumtimi në disa institucione relevante dhe puna në terren”, thotë për Radio “Evropa e Lirë”.
Kujtojmë se anëtarët e Komisionit aktual, janë personalitete që e kanë kundërshtuar versionin e Demarkacionit të kufirit me Malin e Zi, të cilin e kishte aprovuar si raport ish-Komisioni shtetëror i cili drejtohej nga Murat Meha, tashmë i dorëhequr, pasi sipas tyre Kosova humb mbi 8 mijë hektarë tokë. /tesheshi.com/
