Nga Blendi Gashi
(Mos)marrëveshja për Demarkacioin me Malin e Zi siç duket do të jetë përfundimtare që Kosova të rrëshqasë drejt zgjedhjeve të parakohshme.
Edhe pse kryeministri Isa Mustafa, njëherit kreyetar i LDK-së disa herë ka pohuar se zgjedhjet do të mbahen në vitin e paraparë, pra më 2018-të, siç duket partia e koalicionit, PDK-ja e Kadri Veselit nuk është e gatshme që vendi të vazhdojë me krizë edhe për dy vite.
Kështu, çdo ditë e më shumë po dalin zëra nga taborri i PDK-së se nëse nuk gjendet një marrëveshje mes partive në pozitë dhe atyre në opozitë për Demarkacionin, atëherë kjo çështje do të mbetet betejë mes partive në zgjedhjet e ardhshme.
Mesazhin se vendi po ec drejt zgjedhjeve të parakohshme, së fundmi nga PDK e ka dhënë përmes një prej njerëzve kryesorë të saj, Xhavit Halitit, i cili është edhe nënkryetar i Kuvendit.
Haliti, në një intervistë dhënë për mediat kosovare ka thënë se nuk është shumë i sigurt se si është arritur marrëveshja për Demarkacion me Malin e Zi, edhe pse kjo marrëveshje është nënshkruar nga ish-kryetari i partisë së tij, Hashim Thaçi.
Ai pret që deri në ratifikimin e kësaj marrëveshje, ekspertët e kësaj fushe të sqarojnë nëse ky proces është bërë në përputhje me dokumentet e pretenduara nga komisioni shtetëror për demarkacion.
Haliti ka bërë me dije se do të ishte mirë që kjo marrëveshje të ratifikohej me konsensus të grupeve parlamentare dhe jo vetëm me dy të tretat e votave.
Nëse një gjë e tillë nuk ndodhë, sipas Halitit, kjo çështje do të mbetej një betejë për fushatën e ardhshme elektorale.
Përmes kësaj deklarate, PDK-ja haptazi po ia bën të qartë LDK-së se po dëshiron të prishë “martesën” me të dhe se koalicioni qeverisës mes tyre nuk mund të përfundojë mandatin.
Kështu, nëse Demarkacioni nuk ratifikohet dhe koalicioni PDK-LDK bie, atëherë pikërisht kjo çështje mund të ndezë acarimet mes këtyre dy partive, për t’i vënë fajin njëra-tjetrës për mosratifikim.
Deputeti i LDK-së, Adem Salihaj, thotë se Demarkacioni do të jetë një çështje shumë e vështirë dhe nuk i ka gjasat e mira që të kalojë në kuvend.
Salihaj thotë se PDK gjithmonë ka shkaktuar kriza dhe i ka shfrytëzuar ato për qëllime të vetat, kuptohet gjithnjë në dëm të Kosovës.
“Edhe këtë herë, por tash një kaste e re, mund ta shkaktojë një krizë dhe ta dërgojë vendin në zgjedhje, sa do që çështja e Demarkacionit nuk do të duhej të ishte një arsye për ta bere këtë. Çështja e territori të Kosovës nuk është një çështje e dikujt në mënyrë të veçantë,është çështje fondamentale e të gjithëve. Askush nuk duhet ta përdor çështjen e tërësisë territoriale të Kosovës për nevoja partiake”, thotë Salihaj, për tesheshi.com.
Ndërsa analisti Nexhmedin Spahiu, thotë se deklarimin e Xhavit Halitit e kupton si fakt që udhëheqësit e PDK-së nuk duan ta ntrashin gabimin e bërë nga ish-lideri i tyre, Hashim Thaçi.
“Jo nuk e kuptoj si kërcënim, por vetëm si fakt që Kadri Veseli, Xhavit Haliti, Adem Grabovci etj, nuk po duan ta trashin gabimin e Isa Mustafës, Hashim Thaçit, e Murat Mehës”, thotë Spahiu për tesheshi.com.
