Grupi i ekspertëve të pavarur, i kryesuar nga deputeti i LDK-së, njëherazi, profesor i gjeografisë, Shpejtim Bulliqi, kanë prezantuar fakte të reja shkencore mbi demarkimin e vijës kufitare Kosovë-Mali i Zi.
Bulliqi ka thënë se në rast të ratifikimit në Kuvend të marrëveshjes në fjalë, Mali i Zi do të ketë rritje të sipërfaqes territoriale.
“Mali i Zi që nga viti 1945 deri më 2015 ka deklaruar se kishte sipërfaqe territoriale prej 13.812 km2, kurse pas nënshkrimit të marrëveshjes rezulton të ketë më shumë në 13.882.44 km2 apo 70.44 km katror më shumë”, ka thënë Bulliqi.
Ai ka theksuar se pjesë e hulumtimit ka qenë një grup i profesorëve të fushave të ndryshme, që gjatë këtyre dy viteve, sipas tij, kanë bërë një punë të jashtëzakonshme, që të nxjerrin të vërtetën rreth demarkimit të kufirit me Malin e Zi.
Sipas Bulliqit, ky hulumtim nuk ka asgjë personale me qarqet politike dhe se qëllimi i vetëm është që të tregojnë të vërtetën se demarkimi me Malin e Zi është bërë gabim.
“Hulumtimi është bërë i bazuar në fakte zyrtare, shtetërore. Në këtë hulumtim janë përdorur 861 harta publike zyrtare të Malit të Zi, përgjatë tërë vijës kufitare të Malit të Zi”, ka thënë Bulliqi.
Ai ka bërë të ditur, po ashtu, se edhe demarkimi i vijës kufitare me Serbinë në të ardhmen do të sjellë probleme të shumta. /tesheshi.com/
