Komisioni për territor i themeluar nga kryeministri Mustafa sot konstatoi se Çakorri nuk është pjesë e Kosovës dhe se vendi nuk humb territor.
Por Fitim Humolli, që për një muaj ishte pjesë e komisionit në fjalë, nuk pajtohet me këto gjetje. Raportin e quan ekskluziv politik dhe historik, pasi thotë se nuk janë zbatuar metoda të njohura teorike dhe praktike të cilat demonstrojnë rezultat të besueshëm për sipërfaqen e vendit.
Humolli në një intervistë për tesheshi. com tregon se kush janë të pakënaqurit tjerë brenda komisionit, derisa ka një mesazh edhe për Tomor Çelën, zëdhënësin e komisionit.
Intervistoi: Blendi Gashi
Profesor Humolli dje u dorëhoqët nga komisioni për matjen e territorit. Së pari pse vendosët t’i bashkangjiteni këtij komisioni? Ç’bashkëpunim keni pas me kryetarin Hivzi Islami dhe me anëtarët e tjerë?
Sikur e kam bërë të njohur edhe në aktin e dorëheqjes sime në një material prej 4 faqesh, arsyet ishin të shumta, por do spikas dy nga to:
- Të shpërfaqi eksperiencën time jo të vogël në çështjet e kadastrit, hartografisë, GIS dhe
- me këtë kontribut nga brenda të ndikoj në vetëdijesimin eventual të anëtarëve të komisionit dhe rrjedhimisht të qeverisë së vendit.
Bashkëpunimi me kryetarin Hivzi Islami është i ndryshëm. Unë kam qenë student i tij, madje shembullor. Ky është relacioni ynë student-profesor për të cilin unë kam pas kënaqësinë.
Sa i përket rastit konkret në këtë komision, atëherë më duhet të them se nuk kemi arrit të pajtohemi gati asnjëherë. Disa nga anëtarët e komisionit më kanë mbështet në qëndrimet e mia, disa edhe privatisht, por nuk kanë pas kurajon ta bëjnë publikisht, ndërkohë që edhe unë kam mbështetur në kërkesat e tyre disa prej këtyre anëtarëve
Cila është arsyeja kryesore që morën vendimin të braktisni komisionin në fjalë? Pse jo më herët, po pikërisht një ditë para se komisioni të prezantoj draftin e parë të raportit?
Drafti i cekur nga ju është bërë sot publik për opinionin e gjerë ndërsa për anëtarët e komisionit është bërë i njohur dje. Pasi kryesuesi ka përfunduar së lexuari këtë draft ka dhënë mundësin e fjalës dhe unë e kam shfrytëzuar këtë moment të pritur për të thënë qëndrimin tim përfundimtar. Ai draft sikur e kam thënë edhe më herët ka qenë ekskluziv politik dhe historik. Përderisa nuk janë zbatuar metoda të njohura teorike dhe praktike të cilat demonstrojnë rezultat të besueshëm për sipërfaqen e vendit, nuk ka ngelë më asnjë arsye që unë të jem pjesë e këtij komisioni.
Sipas jush sa është profesional komisioni i themeluar nga kryeministri? Keni thënë se në komision janë bërë shumë shkelje. A mund të tregoni disa prej tyre?
Komisioni ka një listë prej një numri të konsideruar të politikanëve, po përmend vetëm dy të cilët kanë qenë pjesëmarrës në vazhdimësi: kryetari i komunës së Pejës dhe kryetari i komunës së Istogut. Në këtë komision ka pas përfaqësues institucionesh të citët janë pakredibilitet profesionalë për obligimet e komisionit. Mos harroni se profesionistët dhe organizmat më përgjegjës për matje në nivel vendi por edhe gjithandej janë topografët-gjeodetët. Departamenti i Gjeodezisë i Universitetit të Prishtinës nuk është ftuar.
Nuk ka shkelje dhe absurditet më të madh se sa të bësh devijime profesionale e të flasësh për sipërfaqen e një territori për pa u caktuar ai territor ose pa u caktuar metoda për matjen e atij territori. Marrje fjalësh, mosaprovim kërkesash, anashkalime të skajshme, dalje në terren pa aprovim të komisionit etj, ka pas të numërta (disa nga to janë të shkoqitura edhe në materialin e dorëheqjes).
Po ndonjë punë a është bërë që ja vlen të përmendet gjatë kohës sa keni qenë edhe ju pjesë e komisionit?
E theksova edhe më sipër se komisioni për territorin është bërë për të mbuluar gabimet e komisionit për Demarkacion, dhe kjo tashmë është publike, njëherit edhe qëndrim i qeverisë së Kosovës.
Zëdhënësi i komisionit Tomor Çela ka thënë për ju se gjatë gjithë kohës keni qenë imponues në diskutime. Si i kundërpërgjigjeni?
Nuk kam pas mundësi të imponoj asgjë unë i vetëm dhe disa herë në përkrahje të dy kolegëve tjerë përball një numri prej përafërsisht 13 përfaqësuesve. Po të ndodhte që unë të imponoja më besoni se do të ndihesha më mirë.
Përveç jush a ka edhe ndonjë anëtarë tjetër të komisionit që është i pakënaqur dhe mund të ndjek rrugën tuaj, pra të largohet? Nëse po, a mund të na thonië ndonjë emër?
Janë edhe dy të tjerë që janë të pakënaqur, Agron Luta dhe Faruk Bojaxhiu. Por përveç tyre ka edhe anëtar tjerë të cilët besoj të jenë të pakënaqur.
Për fund, me marrëveshjen aktuale për Demarkacionin, a humb territor Kosova apo jo? Po gjetjet e komisionit se Çakorri nuk është në Kosovë si i shihni?
Me versionin aktual Kosova humb territor. Kurse sa i përket gjetjeve të raportit, u vërtetua edhe për publikun njëanshmëria e skajshme e komisionit për territor e fshehur për më shumë se një muaj. Dhe tani më çdo gjë është sheshazi. /tesheshi.com/
