Ndërsa qeveria të hënën do procedojë në Kuvend marrëveshjen për Demarkacionin me Malin e Zi, lideri i AKR-së, Behgjet Pacolli, kërkon që të ketë një konsensus gjithëpartiak për marrëveshjen në fjalë, në të kundërtën paralajmëron tensione dhe trazira.
Pacolli thotë se për t’i gjetur zgjidhje Demarkacionit duhet ndryshuar qasja.
“Besoj se demarkacioni ka zgjidhje, por jo me këtë qasje, dhe zgjidhja është atëherë kur ka një vullnet gjithëkosovar, gjegjësisht të të gjitha institucioneve, që ky problem të zgjidhet. Zgjidhja duhet të ndodhë. Me këtë situatë siç qeveriset sot, siç bëhet politikë sot, siç vepron edhe opozita e tanishme, problemi i demarkacionit nuk zgjidhet. Demarkacioni do të shkaktojë problem, do të shkaktojë trazira, do të shkaktojë edhe zgjedhjet,” ka thënë Pacolli në një intervistë për agjencinë “EkonomiaOnline”.
I pari i AKR-së ka thënë se qeveria gaboi kur e nënshkroi marrëveshjen me Malin e Zi për demarkacionin.
Por nuk i pëlqen as qasja e opozitës karshi kësaj problematike.
“Unë nuk kam qenë pjesë e asnjë komisioni sa i përket Demarkacionit; e kam shikuar vetëm nga periferia. Është bërë gabim që është nënshkruar një dokument me Malin e Zi ende pa u miratuar në parlament, dhe sot nga opozita është duke u shfrytëzuar ky gabim në mënyrë drastike. Po shfrytëzohet jo për zgjidhje në mënyrë konstruktive, por në mënyrë destruktive; ky është realiteti,” është shprehur Pacolli.
Ndryshe, Lëvizja Vetëvendosje ka paralajmëruar protesta dhe rikthim të gazit lotësjellës në Kuvend për të ndaluar ratifikimin e marrëveshjes për Demarkacionin. /tesheshi.com/
