Thirrjet e ndërkombëtarëve për ta votuar Demarkacionin me Malin e Zi, aspak nuk po i pëleqejnë kryevetëvendosësit Albin Kurt i cili ju ka bërë thirrje atyre, siç thotë, të mos pranojnë ryshfetin e pushtetarëve kriminelë.
“8200 hektarët nuk janë as tokë e Rusisë, as e BE-së. 8200 hektarët janë në skajin perëndimor të Kosovës së orientuar kah perëndimi, te BE-ja dhe NATO-ja. 8200 hektarët nuk janë kurrfarë udhëkryqi gjeopolitik lindje-perëndim. 8200 hektarët nuk janë as çiflig e pronë e pushtetarëve të korruptuar që duan ta japin si ryshfet për të garantuar vazhdimin e pushtetit. Ajo tokë ka qenë gjithnjë e Kosovës, e shqiptarëve, dhe kjo është dëshmuar gjerësisht me dokumentacion vendor e ndërkombëtar. Serbë dhe malazezë aty nuk ka patur kurrë, përveçse me uniformë, por edhe ata janë shporrur”, shkruan Kurti në Fcebook.
Ai më tej thotë se toka synohet të jepet si çmim i paguar për lënien rehat të të korruptuarve e tradhtarëve.
“Nuk është çmimi i parë që ata paguajnë për të mbetur në pushtet, nuk është as çmimi i fundit. Atyre nuk u dhimbsen këto çmime, sepse paguajnë me nderin, gjakun, pasurinë e popullit, e jo me të tyren. Në fakt, sa më shumë e zvogëlojnë Kosovën, aq më shumë u rritet pasuria e pushteti. Vendet mike të Kosovës nuk duhet të sillen në mënyrë cinike, duke pranuar ryshfetin e pushtetarëve tanë kriminelë. Qytetarët e Kosovës e meritojnë të drejtën për të udhëtuar lirshëm, pa viza, pa patur pse të durojnë këtë dhunë e poshtërsi. Tokën nuk e japim. Ne nuk kemi hesap të vazhdojmë me këta pushtetarë”, shkruan Kurti. /tesheshi.com/
