Ish-lideri i Vetëvendosjes, Albin Kurti, tashmë vetëm deputet, por tejet aktiv, ka paralajmëruar luftë për shkak të demarkacionit me Malin e Zi, sipas versionit që pritet të ratifikohet në parlament.
Në një intervistë të fundit të tij dhënë medias kosovare, Kurti tha shprehimisht: “Unë mendoj që Demarkacioni i Murat Mehës bën konfliktin, luftën dhe gjakderdhjet e reja me Malin e Zi”, por ai shtoi se personalisht është kundër luftës me Malin e Zi, ndonëse sipas tij, lufta nuk vjen në Prishtinë, por ndodh atje ku është kontesti kufitar e territorial.
“Mos harroni se në vitin 1998 në Kosovë ka pasur luftë, por në Prishtinë ka mundur të mos ketë. E mbaj mend shumë mirë se në Prishtinë ka pasur paqe, por në Drenicë, Dukagjin e Llap ka pasur luftë. Kur po them luftë, nuk po them se lufta vjen në Prishtinë, por ajo ndodh atje ku është kontesti kufitar e territorial”, ka theksuar Albin Kurti në intervistën e tij.
Sakaq, Demarkacioni ende nuk po rikthehet në Kuvendin e Kosovës. Kryeministri Isa Mustafa ka ftuar opozitën për bisedime, por kjo e fundit ëshët e prerë në qëndrimin e saj se nuk mund ta pranojë ndarjen e përcaktuar. /tesheshi.com/
