Ambasadori amerikan në Kosovë, Greg Delawie ka shprehur shqetësimin lidhur me ndikimin politik ndaj gjykatave në Kosovë.
“Jam i shqetësuar për ndikimin politik mbi gjykatat në Kosovë. Shpresoj që ky koalicion do të kërkojë përparim në sundimin e ligjit. Luftimi i korrupsionit ka qenë prioritet, do të ofrojmë mbështetjen morale për ata miq që i ndajnë mendimet tona”, tha Delawie në kuadër të javës “Kundër Korrupsionit”, që po mbahet nën organizimin e koalicionit të organizatave joqeveritare në Kosovë.
Delawie ka kërkuar vazhdimin e punës, në luftën ndaj korrupsionit.
“Korrupsioni është i rrënjosur thellë. Nuk mund të ç’rrënjoset brenda një nate ose viti. Përparimi është i pamundur pa pasur këmbëngulje. Duhet të vazhdojë puna. Kemi korrupsion në prokurim publik që pengon investimet”, pohoi ai.
Në diskutime po marrin pjesë përfaqësues nga Instituti Demokratik i Kosovës (IKD), Grupi për Studime Juridike dhe Politike (GLPS), Instituti GAP, Çohu, Iniciativa për Progres (INPO), Instituti (KIPRED) dhe Columbus. /tesheshi.com/
