Zyrtarisht Universiteti i Tiranës ka “mbetur në klasë” si universiteti më i keq në Shqipëri. Ai ka arritur të marrë vetëm 1 vit akreditim dhe të paktën 17 detyra për të kryer që të mund të kërkojë një akreditim të ri në vitin 2018.
Agjencia e Sigurimit të Cilësisë në Arsimin e Lartë (ASCAL) ka publikuar më në fund të gjithë raportin e hartuar nga Agjencia Britanike AAQ (Agjencia e sigurimit të cilësisë) për akreditimin e universiteteve shtetërore dhe private shqiptare.
Për herë të parë universitetet shtetërore u futën në një survejim për cilësinë e mësimdhënies dhe komponentëve të tjerë dhe survjerimi britanik nxori probleme të mëdha tek shumica e uiniversiteteve publike.
Vetëm universiteti i Mjekësisë dhe ai Fan Noli në Korçë kanë arritur një akreditim për 5 vite, nga 6 vite që është maksimali, kurse të tjerët kanë rezultuar me shumë probleme.
Procesi ka përfunduar edhe për 4 universitete private, ku Marin Barleti ka marrë notën ekselente me 6 vite akreditim, ndërsa ndiqet nga UET, Kolegji Profesional i Tiranës dhe Shkolla e Lartë “Nehemiah Gateëay” me nga 5 vite akreditim. Për universitetet e tjera private do të kemi një raport në muajin tetor të këtij viti.
“Universiteti i Tiranës”, Akreditimi britanik i jep 1 vit kohë dhe 17 detyra shtëpie
Agjensia Britanike e kontraktuar nga qeveria shqiptare për të vlerësuar institucionet e arsimit të lartë i ka dhënë Universitetit të Tiranës Akreditimin Institucional me kohëzgjatjen prej 1 (një) viti akademik. Afati përfundimtar i vlefshmërisë së akreditimit Institucional është 30/09/2018.
Në raportin e publikuar sot nga APAL ky vendim shoqërohet me konstatimin e problemeve dhe janë të dhënë 17 rekomandime për përmirësimin e performancës brenda këtij viti.
Rekomandime:
Universiteti të përshtatë dhe përmirësojë menjëherë Statutin e tij, duke përcaktuar misionin dhe objektiva të qarta të Universitetit;
Universiteti të hartojë dhe zbatojë menjëherë një strategji zhvillimi ku të përfshihen misioni dhe qëllimi i tij si dhe të përcaktohen objektivat e përshtatshme;
Universiteti të sigurojë që raporti vjetor të përcillet në Ministrinë e Arsimit, Sportit dhe Rinisë në kohën e duhur dhe në përputhje me parashikimet ligjore dhe statutore;
Brenda vitit 2018, Universiteti, të sigurojë realizimin e një studimi tregu në mënyrë të centralizuar, për tu përdorur në hartimin e strategjisë së zhvillimit, misionit dhe qëllimit të tij;
Deri në 2018, Universiteti, duhet të implementojë një qasje gjithëpërfshirëse, të qëndrueshme dhe të dokumentuar për vlerësimin periodik të performancës dhe aftësive të stafit;
Deri në 2018, Universiteti, duhet të rishikojë dhe përditësojë faqen zyrtare të internetit, për të siguruar një platformë të qëndrueshme, në dy gjuhë, që i përshtatet qëllimit të tij dhe plotëson nevojat e të gjithë palëve të interesuara;
Universiteti, duhet të ndërmarrë hapa për tu siguruar që ka burime të mjaftueshme për të mundësuar infrastrukturë dhe mjedis të përshtatshëm për performimin akademik dhe shkencor;
Universiteti, duhet të përfundojë brenda vitit të ardhshëm akademik, shqyrtimin e bazës së të dhënave të programeve të studimit që ofron, për të siguruar përditësimin dhe saktësimin e tyre në përputhje me kërkesat ligjore;
Universiteti duhet të zhvillojë dhe zbatojë një qasje strategjike për rritjen e mobilitetit të studentëve;
Universiteti duhet të sigurojë politika dhe procedura të qarta e të dokumentuara që venë në dukje qasje për vlerësimin në nivel institucional, deri në Gusht 2018;
Universiteti duhet të zhvillojë dhe zbatojë një politikë formale për plagjiarizmin dhe shkelje të tjera akademike, deri në Gusht 2018;
Universiteti duhet të qartësojë dhe publikojë qasjen e tij për sigurimin e cilësisë së programeve të studimit, deri në Gusht 2018;
Universiteti duhet të zhvillojë dhe zbatojë një strategji formale kërkimore për të adresuar prioritetet e kërkimit institucional, deri në Gusht 2018;
Universiteti duhet të ndërmarrë veprime sistematike për të përmirësuar disponibilitetin dhe aksesin në tekstet dhe burimet online në bibliotekë;
Universiteti duhet të hartojë politikë shëndetësore formale, përfshirë procedurat për vlerësimin e efektivitetit të saj, deri në Gusht 2018;
Universiteti duhet të ngrejë një strukturë dhe hartojë procedura për mbledhjen dhe ruajtjen e të dhënave në lidhje me punësimin e të diplomuarve të tij, deri në Gusht 2018.
Brenda 3 (tre) muajve nga publikimi i këtij vendimi, “Universiteti i Tiranës” duhet të hartojë një Plan Veprimi konkret për përmbushjen e këtyre rekomandimeve dhe ta dorëzojë atë pranë Agjencisë së Sigurimit të Cilësisë në Arsimin e Lartë.
Akreditimi në vite i 12 universiteteve publike:
Universiteti i Mjekësisë, Tiranë 5 vite akreditim
Universiteti Fan S. Noli, Korçë 5 vite akreditim
Universiteti i Arteve 4 vite akreditim
Universiteti “Aleksandër Moisiu” Durrës 5 vite akreditim
Universiteti Bujqësor i Tiranës 4 vite akreditim
Universiteti “Eqrem Çabej”, Gjirokastër 3 vite akreditim
Universiteti “Ismail Qemali”, Vlorë 3 vite akreditim
Universiteti i Sporteve të Tiranës 3 vite akreditim
Universiteti i Elbasanit “A. Xhuvani” 3 vite akreditim
Universiteti Politeknik i Tiranës 3 vite akreditim
Universiteti “Luigj Gurakuqi”, Shkodër 2 vite akreditim
Universiteti i Tiranes 1 vit akreditim /tesheshi.com/
