Kreu i opozitës ruse Alexei Navalny është liruar nga burgu pas 30 ditësh, njoftoi në Tëitter zëdhënësja e tij Kira Yarmisch, sipas Reuters.
Pasi doli nga burgu, ai tha se protestat kundër autoriteteve do të vazhdojnë dhe do të jenë më masive.
“Tani ne po shohim se gënjeshtrat dhe mashtrimet e tyre nuk janë të mjaftueshme. Nuk është e mjaftueshme për ata të ndalojnë kandidatët të garojnë në votime. Ata qëllimisht duan të arrestojnë dhjetëra dhe të rrahin qindra … Kjo tregon se nuk ka mbështetje për këtë regjim. Ata ndjehen dhe janë të frikësuar”
Navalny shtoi se ai nuk kishte asnjë dyshim se vala e protestave do të rritet, paçka atyre që i cilësoi si “akte të vërteta të frikësimit dhe terrorit që po ndodhin aktualisht ndërsa njerëzit po arrestohen rastësisht”.
Ai tha se “regjimi do të pendohet seriozisht për atë që ka bërë,” njoftoi Reuters.
Gjykata e Moskës më parë kishte mohuar kërkesën e drejtorit të burgut në të cilin Navalny kishte vuajtur një dënim prej 30 ditësh që ai të zgjatej dhe për 18 orë.
Navalny, i cili konsiderohet armiku më i madh i Kremlinit, u dënua muajin e kaluar me 30 ditë burg për organizimin e protestave të paligjshme të opozitës.
Ndërsa ishte në burg, një skuqje e rëndë u shfaq në fytyrën e tij, për të cilën mjekët thanë se ishte rezultat i një reaksioni alergjik, raportoi AP.
Ai kaloi 18 orë në spital për shkak të skuqjes, dhe disa përkrahës të Navalny-t besojnë se ai ishte helmuar.
Drejtori i burgut ku Navalny po vuan dënimin e tij kërkoi që dënimi i tij të zgjatej për 18 orët e lartpërmendura, por kërkesa u refuzua nga gjykata e Moskës. /tesheshi.com/
