Nuk është një fotoshop; Lulzim Basha është takuar në SHBA me Presidentin amerikan, Donald Trump gjatë një vizite që ka nisur prej dy ditësh; një takim ky i paralajmëruar gjatë një takimi me fermerë në Korçë pak ditë më parë.
Vetë Basha që ka shpërndarë foton në faqen e tij zyrtare shkruan:
“Takim i jashtëzakonshëm me Presidentin Donald Trump! Vizioni dhe kauza e tij janë frymëzim dhe inkurajim kolosal për lëvizjen tonë për një Republikë të qytetarëve, me ekonomi të fortë dhe të nesërme të sigurt për të gjithë shqiptarët.
Sapo mbylla një vizitë dy ditore në Shtetet e Bashkuara të Amerikës gjatë Javës së Shtëpisë së Bardhë për Zhvillimin e Fuqisë Punëtore ku po diskutohen iniciativat e administratës Trump mbi uljen e taksave, trajnimin profesional, stazhet e punës dhe financimin e studimeve.
Mirënjohje të pakufishme Presidentit Trump dhe SHBA për mbështetjen për Shqipërinë dhe shqiptarët!”, shkruan Basha me nota të forta deliri, e kuptueshme kjo për një politikan shqiptar, e aq më tepër kur është fjala për kreun e demokratëve në Shqipëri. /tesheshi.com/
