Pas tetë vitesh, pas një Botërori e një Europiani të fituar, Del Bosque ka vendosur t’i thotë mjaft qëndrimit në krye të përfaqësueses spanjolle.
Ai do ta merrte detyrën tetë vite të shkuara nga i ndjeri Luis Aragones, për ta udhëhequr Spanjën drejt fitimit të të parës Kupë Bote në historinë e saj. Një Europian i dytë i fituar radhazi do t’u shtohej sukseseve të tij.
Por si çdo gjë, dhe cikli i fitoreve të kombëtares spanjolle të futbollit do të niste të mbyllej me atë eliminim të turpshëm dy vite të shkuara në Brazil, në Botërorin e 2014-tës. Del Bosque kërkoë të dorëhiqej asokohe, por u bind të qëndronte.
Eliminimi tani në Europian i Spanjës i ka dhënë fund dilemës, edhe pse Del Bosque ngjan ta ketë marrë vendimin kohë më parë.
“Nuk kam asnjë synim të qëndroj si trajner,” deklaroi ai për Radio Nacional.
“Nuk kisha asnjë dyshim se cila do të qe e ardhmja ime, cilido që të ishte rezultati i Europianit.”
Megjithatë, ai njoftoi se do ta respektojë kontratën e do të qëndrojë në detyrë gjer në fund të saj, më 31 korrik.
“Ka plot trajnerë të kualifikuar,” ka thënë ai kur është pyetur për zëvendësuesi e tij.
Del Bosque ka drejtuar më herët dhe Realin e Madridit, e po ashtu ka qenë për një kohë të shkurtër dhe trajneri i Beshiktashit në Turqi.
Ai, veç sukseseve, do të mbahet mend për karakterin e pakritikueshëm, për qetësinë e tij, e për mungesën e plotë të dëshirës për të krijuar polemika. /tesheshi.com/
