Kryeministri Edi Rama tha se mazhoranca nuk do të bëhet pengesë në asnjë çast për dekriminalizimin. Në komentet gjatë konferencës së fundvitit, ai saktësoi se për të, procesi i dekriminalizimit ka përfunduar ditën kur mazhoranca ka votuar ligjin.
I pyetur për vendimin më të fundit të Komisionit Qendror të Zgjedhjeve që ndërpreu mandatin e dy deputetëve, Shkëlqim Selami e Dashamir Tahiri dhe kryebashkiakut të Kavajës, Elvis Rroshi, ai nuk u ndal në emra të përveçëm. Sipas shefit të Qeverisë, janë institucionet që duhet të zbatojnë ligjin dhe jo frymëzimi të shkuarës që përkthehet shumë rëndom në gjueti shtrigash.
“Unë nuk bëj gjueti shtrigash. E kam neveritur dhe një nga arsyet pse i jam kundërvënë atij regjimi ka qenë gjuetia e shtrigave. Ligji është aty dhe institucionet duhet ta zbatojnë”, deklaroi Rama.
“Mbledhja e djeshme dha një shembull kuptimplotë të këtij vullneti parimor, ashtu sikurse dha një shembull të hipokrizisë të PD-së dhe drejtuesve të saj që tjetër thonë, tjetër bëjnë”, komentoi Rama. /tesheshi.com/
