Mazhoranca është e vendosur të miratojë draftin e dekriminalizimit pa “budallallëqet” e propozuara nga opozita. Kryeministri Edi Rama u shpreh i gatshëm të kërkojë dhe të arrijë në kompromis me opozitën për ligjin e dekriminalizimit, por si tha “një krahasim i dy drafteve flet vetë me propozimet qesharake në draftin e opozitës”. Komentet u bënë për gazetarin Sokol Balla në Top Story.
“Ne i kemi dhënë përgjigje të duhur fenomenit për të cilin flasim dhe me draftin tonë sigurojmë që persona të dënuar për kategori të ndryshme veprash penale jo më pak se dy vjet, nuk mund të zgjidhen apo emërohen. Janë 73 vepra të ndryshme penale dhe legjitimiteti për t’u zgjedhur apo emëruar në administratën e shtetit përcaktohet sipas veprave, nga pamundësia e përjetshme për të patur një vend si i zgjedhur apo funksionar i shtetit, tek 20 apo 10 vjet”, theksoi Rama.
Sa i takon thirrjeve që vijnë nga ndërkombëtarët, më së fundmi, nga parlamenti Europian për një ligj të miratuar nga të dyja palët politike, Rama tha se shumica është e gatshme të gjejë konsensus, por me një kusht, “që asnjë shpikje alla-shqiptarçe nuk pranohet”.
“Jemi gati të bëjmë konsensus, por nuk mund të pranojmë budallallëqet e opozitës. Jemi të gatshëm që të dëgjojmë çdo sugjerim, kërkesë, vërejtje me kusht që ligji të qëndrojë brenda kornizës së standardeve ndërkombëtare. Ne e kemi bërë dekriminalizimin një gjë kaq bombastike, ndërkohë që italianët kanë 25 vjet që merren me penetrimin e mafias në Parlamentin e tyre. Fenomeni ekziston, problemi ekziston, ta trajtojmë ashtu siç duhet, jo duke sugjeruar gjëra që nuk i ka bota”, tha kryeministri.
I pyetur sesi do t’i gjejë votat në parlament për votimin Rama u shpreh se interesi është për një zgjidhje të përbashkët. Por, tha ai, “parlamenti është i larmishëm”, duke sugjeruar se votat mund të gjenden.
“Në thelb shqetësimi është i njëjtë dhe draftet nuk janë të ndryshme në tërësinë e përmbajtjes, por në draftin tonë nuk ka asnjë shpikje alla-shqiptarçe, në draftin tjetër ka disa shpikje që ne nuk i pranojmë”, tha Rama. /tesheshi.com/
