Që nga nisja e betejës për nxjerrë jashtë Kuvendit “kriminelët” që vetë i futën, partitë politike po humbasin deputetë dhe kredibilitet tek votuesit. Sipas llogaritjeve të para, mazhoranca ka “sakrifikuar” 6 deputetë, ndërsa PD-ja 1. Ironia e ligjit: penalizohen ata që e kanë fshehur dënimin e jo ata që janë dënuar…
Ligji për dekriminalizimin u nis nga opozita më shumë se një vit më parë si një betejë politike në Kuvend për të goditur “të fortët” e mazhorancës, deputetë që vinin nga bota e krimit, me të shkuar të dyshimtë. Shumica prej tyre ishte deputetë të veriut, zonë, ku nëse do të marrim për bazë fjalët e kryeministrit Rama, PS mund të fitonte veç me të fortët e zonës.
Sfida e “pastërtisë” u pranua edhe nga mazhoranca, gjithmone me preteksin dhe argumentin se në krahun e akuzuesve kishte më shumë kriminelë se sa nga ana e saj. Kështu lindi ligji i ‘dekriminalizimit’ të politikës, ku parashikohet që nuk do të futen në listat e partive dhe nuk do të marrin funksione publike njerëz që fshehin në formularin e vetdeklarimit të shkuarën e tyre me drejtësinë, dënime me burg apo me gjobë për vepra të ndryshme penale.
Ndërsa kryeministri Rama përbetohej në media se: “Ky është një bllof i PD-së, mezi e pres këtë dekriminalizim, një term vulgar për një vend parlamentar, që të shoh kush janë këta kriminelë. Ky ligj nuk kap asnjë deputet të PS-së”.
Por koha e afërt pas kësaj deklarate tregoi të kundërtën.
Para se ligji të miratohej ngjarjet sollën ndryshimet e para në këtë drejtim duke bërë të mundur largimet e para nga kampi socialist. Arben Ndoka, deputet i Lezhës, la mandatin e deputetit pasi u bë publike dosjen e gjykatës së Romës që e dënonte me 7 vjet burg për trafikimi të qënieve njerëzore me qëllim shfrytëzimin për prostitucion.
Armando Prenga, një tjetër deputet socialist i Veriut, u përfshi në një konflik me armëduke përfunduar para drejtësisë. Tom Doshi dhe Mark Frroku, po ashtu deputetë të PS-së nga Veriu, u përfshinë në një skandal pas publikimit të një video që pretendonte se kryetari i LSI-së Ilir Meta kishte paguar dikë që të vriste Doshin. Doshi dhe Prenga janë përjashtuar nga PS-ja.
Prokuroria e balancuar
Zyrtarisht vetëm 2 deputetë dhe 1 kryebashkiak janë deklaruar fajtorë sipas ligjit të dekriminalizimit nga prokuroria, e cila është kujdesur maksimalisht të jetë e balancuar politikisht duke zgjedhur nga një zyrtar për çdo parti.
PS u prek aty ku kryeministri Rama bënte “be” për pastërtinë e tij; Elvis Roshi. Prokuroria bëri të ditur se ai nuk kishte deklaruar veprën penale të përdhunimit, i dënuar në Itali, dhe ndryshimin e emrit disa herë, duke rrëzuar kështu “modelin e pastërtisë” që kishte ofruar Rama me kryebashkiakun e Kavajës.
Lëvizja Socialiste për Integrim kishte në listën e prokurorisë deputetin Shkëlqim Selami, ndërsa PD-së iu hoq një deputet që kishte importuar nga PDIU-ja, Dashamir Tahiri, i cili gjithashtu ishte në listë se kishte fshehur dy dënime në Itali.
Së fundmi dhe një zyrtar i lartë i Kuvendit, Genc Muçaj, ish-ambasador i Shqipërisë në Turqi, aktualisht Drejtor i Shërbimeve dhe Marrëdhënieve Shumëpalëshe dhe Dypalëshe pranë Kuvendit, u çua në gjyq nga Prokuroria e Tiranës, pasi ka fshehur të dhënat në formularin e Dekriminalizimit. Sipas Prokurorisë së Tiranës, Muçaj ka fshehur një dënim të Gjykatës së Tiranës në vitin 2008. Ai është dënuar me 133 mijë lekë gjobë, për akuzën e falsifikimit të dokumenteve shkollore, si dhe ka shkruar emrin e babait gabim në formular.
Dekriminalizimi, po kap kriminelët apo “nxënësit e këqinj”?
Rasti i Muçajt tregon se ai duhej të ishte më i kujdesshëm kur të plotësonte formularin. Mesa duket ligji nuk synon të pastrojë politikën nga kriminelët, por të kapë gabimet e tyre në testim.
Nëse je dënuar nga gjykata por je i sinqertë dhe e shënon këtë në formular nuk të kap ligji i dekriminalizimit. Kështu duket se po funksionon logjika e këtij ligji, duke e bërë të pakuptimte termin “dekriminalizim” që pretendon pastrimin e politikës nga njerëzit që kanë pasur probleme me drejtësinë.
Të paktën disa deputetë të PD-së kanë rekorde të tilla, por akoma nuk ka një verdikt të prokurorisë për ta. Pak kohë më parë, anëtarë të grupit parlamentar socialist kërkuan verifikim për deputetë të PD-së si Flamur Noka, Alban Zeneli, i dënuar me burg, dhe për Arben Ristanin, numrin dy të Partisë Demokratike, i dënuar gjithashtu me burg. Pretendohet se Noka ka fshehur arrestimin e tij në vitin 1991 nga organet e sigurisë së ish-Jugosllavisë. Në dokumentat e asaj periudhe, të botuara në media, thuhet se zyrtarë të shërbimit sekret jugosllav, UDB, i bënë atij një ofertë për bashkëpunim, duke i ofruar edhe një punë, ndërsa Noka dha informacion në lidhje me themelimin e PD, ngjarjet në Shkollën e Bashkuar dhe rrëzimin e monumentit të Enver Hoxhës. Më pas ai u deportua në Shqipëri.
Kërkesë për përjashtim dhe për Zenelin dhe Ristanin
Në kërkesën e PD-së drejtuar Prokurorisë, thuhet se në të njëjtën mënyrë duhet të veprohet për Alban Zenelin, deputetin e dënuar me burg, por edhe për Arben Ristanin, numrin dy të Partisë Demokratike, i dënuar gjithashtu me burg.
Por ndërsa Noka nuk e ka deklaruar një gjë të tillë në formular, Zeneli ka deklaruar se rezulton i dënuar dy herë me vendim të formës së prerë, me 6 muaj burg dhe me 30 000 lekë gjobë. Vepra e kryer është ajo e shkeljes së rregullave të qarkullimit rrugor dhe kundërshtim të punonjësve të policisë. Ndërsa Ristani rezulton i dënuar me 5 muaj burg dhe me një vit liri me kusht për veprën penale “Dhënie vendimi të padrejtë”, vendim i cili është shfuqizuar më vonë. /tesheshi.com/
