Partia Demokratike ka depozituar në prokurori dy kërkesa në lidhje me ndërprerjen e mandatit të dy ligjvënësve me pretendimin se janë subjekt i ligjit të dekriminalizimit.
Sipas demokratëve, Aqif Rakipi i PDIU-së dhe Gjetan Gjetani i PS-së, kanë rekorde kriminale në shtetin italian.
PD përmes kërkesës së firmosur nga deputetët e saj, i kërkon prokurorisë që të nisë verifikimet e të dhënave, referuar deklaratave personale të bëra nga dy deputetët.
“Nga të dhëna të bëra me dije në rrugë informale, ekziston dyshimi i arsyeshëm se subjektet Gjetan Gjetani dhe Aqif Rakipi ndodhen në kushtet e ndalimit për të kandiduar dhe për t’u zgjedhur në një funksion të lartë publik, për shkak të rekordeve kriminale në shtetin italian”, thuhet në kërkesën e PD.
Në vijim, PD kërkon nga Prokuroria që në zbatim të detyrimit të parashikuar nga neni 8 i këtij ligji të bëjë verifikimin e të dhënave.
“Kjo kërkesë e jona bëhet në kushtet kur pavarësisht fakteve të njohura botërisht, institucioni juaj nuk ka kërkuar verifikimin e plotë të të dhenave, kryesisht, në përputhje me pikën 4 të nenit 8 të ligjit”, thuhet në kërkesën e PD-së.
Ndërkohë ndaj kërkesës së demokratëve, ka reaguar deputeti Aqif Rakipi, sipas të cilit akuzat e PD janë thjesht sulme politike. /tesheshi.com/
