Kuvendi është përfshirë nga debate të ashpra në lidhje me dekriminalizimin, ndërsa opozita akuzoi mazhorancën se po shkrin komisionin parlamentar për hartimin e ligjit të posacëm.
Paraqitja e një drafti paralel nga qeveria me atë të opozitës në komision, është parë nga deputetët e shumicës si një lëvizje që i vë pikëpyetje ekzistencë së tij.
Në këtë kontekst, ish-kryeministri Berisha akuzoi gjatë seancës së sotme, se qeveria po shkrin komisionin, pavarësisht se “me asnjë lloj mekanizmi nuk mund të shkrihet një komision i votuar në Parlament”.
“Nuk duhej lejuar në asnjë mënyrë shkrirja e komisionit të Dekriminalizimit. Ky është një akt shumë i rëndë dhe me këtë akt është vrarë besimi. Kemi të bëjmë me një akt të shëmtuar, që vetëm një njeri në historinë politike të këtij vendi ia ka lejuar vetes ta bëjë: Edi Rama”, akuzoi Berisha.
Partia Demokratike paralajmëroi me këtë rast, dështimin e negociatave për miratimin e një ligji për dekriminalizimin e institucioneve.
“Nëse ju ecni duke varrosus konsnesusin të jeni të bindur se varrosim demokracinë në këtë vend, varrosim stabilitetin dhe të ardhmen e stabilitetit”, tha Berisha.
Ish-kryeministri ka folur edhe për skenar nga ana e shumicës, duke thënë se e gjitha ishte në dakordësi. “Në kohën kur Bylykbashi po kërkonte të komunikonte me të autorizuarën e Ramës, ministren Felaj, ajo mbylli telefonin dhe doli e lexoi vendimin e qeverisë që zhvishte komisionin parlamentar. Ky është një akt shumë i rëndë. Asgjë më kriminale, asgjë më anti kombëtare se vrasja e besimit nuk ka”, përfundoi Berisha.
Varianti i qeverisë për dekriminalizimin, në ndryshim nga varianti i PD-së, nuk parashikon testin e drogës për zyrtarët e lartë. /tesheshi.com/
