Nga Eva Gjura
Partia Demokratike e Korçës është gati për betejën e radhës elektorale. Ky konfirmim vjen nga deputeti i këtij qarku për PD z. Gjergji Papa, i cili gjatë një interviste për ‘tesheshi.com’ shprehet se strukturat kanë kohë që kanë nisur punën si për organizmin ashtu edhe për përzgjedhjen e kandidatëve. Z. Papa informon se tashmë emrat më potencial të zgjedhur nga strukturat lokale janë dërguar në degën e PD qendrore në Tiranë dhe pritet vetëm zyrtarizmi i kandidaturave, të cilët do të nisisë garën për pushtetin vendor. Sipas tij janë përzgjedhur emrat me përgjegjshmëri të madhe politike, intelektuale, profesionale dhe qytetare.
Pak ditë na ndajnë nga nisja e fushatës elektorale për zgjedhjet lokale. A është gati PD e qarkut Korçë për ketë garë ?
Zyrtarisht, fushata elektorale për zgjedhjet e qeverisjes vendore, vërtet starton pas pak ditësh, por strukturat e PD në të gjithë qarkun e Korçës kanë kohë që kanë filluar punën intensivisht. Puna filloi me zbatimin e detyrave të urdhërit të Kryetarit të PDSH, z. Lulzim Basha, gjatë muajit shkurt. Në çdo njësi vendore, u ngritën grupet e punës së fushatës zgjedhore dhe menjëherë pas saj, filloi procesi i përzgjedhjes së kandidatëve, në mbledhjet dhe konsultimet në të gjitha seksionet e më tej në grupseksionet. Kandidaturat më të mira të propozuara dhe që plotësonin kriteret e përcaktuara, u miratuan në mbledhjet e kryesive të degëve të PD së rretheve dhe tashme, të shoqëruara me CV e tyre, janë vënë në dispozicion të Kryesisë së PDSH, e cila shumë shpejt do të marrë vendimin se cilët kandidat do të përfaqësojnë PD në këto zgjedhje.
Cilët janë emrat me potencial të cilët baza e PD kërkon të ketë si kandidat?
Kandidatët potenciale, të propozuar nga baza e PD, sipas procedurës që unë përmenda më lart, janë të shumtë dhe nuk do të doja tua përmendja të gjithëve emrin. Përzgjedhja e tyre është bërë me shumë kujdes dhe me përgjegjshmëri të madhe politike, intelektuale, profesionale dhe qytetare.
Në çdo prag zgjedhjesh diskutimi kryesor është mbrojta e votave nga manipulimi. A ka një strategji PD për mbrojtjen e tyre?
Tashmë gjithë opinioni është i njohur me faktin se maxhoranca PS-LSI erdhi ne pushtet me mashtrime të bujshme elektorale, premtime për vende pune dhe, ajo që është më e keqja, me blerje masive të votës. Mediat transmetuan me zë dhe figurë se si bliheshin votat nga PS në Korçë. Sikur të mos mjaftonte kjo, maxhoranca amnistoi në parlament këtë vepër penale tejet të rëndë. PD është e bindur që PS dhe LSI, edhe në këto zgjedhje, për të fituar me çdo kusht, do të përdorin presionin e pushtetit qendror dhe blerjen e votës me paratë e fituara nga krimi dhe korrupsioni. Ne kemi përgatitur një strategji të detajuar për të mbrojtur çdo votë dhe për të denoncuar çdo manipulim që mund ti bëhet shprehjes së vullnetit të lirë të qytetarëve.
Në çfarë faze është diskutimi mes PD dhe partive aleate, a është diskutuar në forumet drejtuese të PD për t’ju lënë zona të lira këtyre aleatëve dhe cilat janë këto zona?
Negociatat midis PD dhe partive aleate të spektrit të djathtë po vazhdojnë. Por negociatat nuk kanë të bëjnë me ndarjen e tortës të zonave të lira, por me përzgjedhjen e kandidateve më të spikatur, që kanë shanset më të mëdha për të fituar, pavarësisht se cilës forcë politike i përkasin.
Keni hyrë në vitin e dytë të opozitës, mendoni se po bëhet opozitë aq sa duhet dhe ashtu siç duhet ?
Mendoj se PD po i përdor me sukses dhe me efiçencë të plotë të gjitha mjetet demokratike të bërjes së opozitës, duke filluar nga debati i fortë i deputetëve të Grupit Parlamentar në komisione dhe në seancë plenare, për keq qeverisjen e vendit nga kjo maxhorancë dhe deri tek protestat masive të qytetarëve anë e mbanë vendit kundër krimit, rritjes së taksave dhe çmimeve, papunësisë varfërisë dhe mjerimit që ka pllakosur vendin.
Çfarë mendoni se çalon sot në kampin e djathtë, a ka ndonjë gjë që po nuk funksionon?
Nuk shoh ndonjë gjë që nuk shkon. E thashë dhe më lart, PD po bën opozitën demokratike më të mirë të mundshme.
Keni ndonjë koment për zhvillimet e fundit parlamentare, arrestimi i dy deputeteve duket sikur ia ka nxire faqen këtij institucioni dhe akuzat qe rendojnë mbi koleget tuaj nuk janë te vogla po te kemi parasysh faktin se ne kuvend duhet te jene njerëzit më e integritet?
Zhvillimet e fundit në parlament, lidhur me arrestimin e dy deputetëve të mazhorancës, tregojnë më së miri sesa e drejtë ishte kauza e bojkotit të deputetëve të opozitës për të detyruar maxhorancën për të miratuar me konsensus një legjislacion që të mos lejoje individët me rekorde kriminale të hyjnë në të gjitha nivelet e pushtetit, përfshi këtu dhe të zgjedhurit vendore, të dalë nga zgjedhjet e 21 qershorit të këtij viti. Procesi i dekriminalizimit është prioritar për PD-në. Afatet e vendosura nga palët me 24 dhjetor 2014 duhen respektuar. Mazhoranca duhet tu përgjigjet me seriozitet të gjitha angazhimeve që ka marrë dhe të respektojë afatet.
Si e shihni qeverisjen e majtë, çfarë po bën mirë, çfarë jo, cilat janë problemet që ka sot kjo qeverisje?
Nuk mendoj se po bën ndonjë gjë të mirë dhe besoj se problemet janë të shumta dhe te prekshme nga të gjithë shqiptarët. Tiparet kryesore të qeverisjes së majtë janë përqëndrimi i pushtetit politik dhe ekonomik, korrupsioni, klientelizmi dhe kriminalizimi. Ekonomia shqiptare është pasqyra më e qartë e papërgjegjshmërisë, paaftësisë dhe babëzisë së një oligarkie, që është sulur të përfitojë sa të mundet dhe ku të mundet për vete. /tesheshi.com/
