Dekriminalizimi do të vijojë në komisionin parlamentar të ngritur për këtë qëllim, misioni i të cilit ishte vendosur nën dyshim pas propozimit të një drafti alternativ nga qeveria. Konferenca e kryetarëve ka diskutuar për procesin dhe nga disa deklarata duket se ka pasur vullnet nga palët që procesi të vijojë në komisionin parlamentar.
Deputeti socialist, Taluant Balla, i është shmangur deklaratave të mëparshme që drafti për dekriminalizimin do të miratohej në parlament edhe pa konsensusin e opozitës. Sipas tij, mbetet për t’u diskutuar çështja nëse ndryshimet kushtetuese që kërkon procesi të bëhen në parlament.
Socialistët kanë deklaruar se amendimi i kushtetutës duhet të bëhet nga Parlamenti, ndërsa LSI-ja pohon se e gjithë korniza ligjore duhet të bëhet nga komisioni i posaçëm. Një gjë e tillë mbështetet edhe nga partia Demokratike.
Një tjetër ndasi që pritet të krijojë sërish debate në komision është testi i drogës për politikanët, që kundërshtohet me vendosmëri nga socialistët, por që përbën pikë të panegociueshme për demokratët. /tesheshi.com/
