Mbreti Selman i Arabisë Saudite ka lajmëruar nëpërmjet një dekreti mbretëror se familjeve të të vdekurve apo të të lënduarve që janë bërë të paaftë për tërë jetën pas aksidentit të fundjavës së shkuar do t’u jepen 1.000.000 rijalë, apo, ndryshe, diku te 267.000 dollarë, kurse atyre të të lënduarve më lehtë do t’u jepet gjysma e kësaj shume, 500.000 rijalë, afërsisht 133.500 dollarë.
Në të njëjtën kohë, këto pagesa nuk do të bëhen pengesë që familjet të hapin dhe procese gjyqësore për të kërkuar kompensim.
Mbreti po ashtu ka bërë të ditur se dy familjarë të të vdekurve do të priten nga mbretëria për haxhin e vitit të ardhshëm. Sa për të lënduarit që nuk mund t’i kryejnë ritualet gjatë këtij haxhi, ata do të kthehen vitin tjetër si miq të mbretit. Një lehtësi tjetër do të jenë vizat e dhëna për familjarët e të lënduarve, për t’u qëndruar atyre pranë në spitalet ku po marrin trajtimin mjekësor.
Për shkak të kohës së keqe, një vinç u rrëzua të premten e shkuar në Xhaminë e Madhe, duke u marrë jetën 111 personave dhe duke plagosur 238 të tjerë. Sipas raportit të organit që po heton incidentin, vinçi u rrëzua nga erërat e forta, por vendosja e tij nuk ishte ajo e duhura. /tesheshi.com/
