Deri para pak vitesh, ai do përbënte krenarinë e rikthyer demokrate, moralin e mbajtur lart të PD-së dhe elektoratit të saj në një moment të vështirë, kur kuotat e prestigjit në elektorat kishin rënë ndjeshëm.
I rikthyer pas më pak se 20 vjetësh nga Amerika, Eduart Selami do përbënte një bojatisje të re në imazhin zbërdhylet të Partisë Demokratike, duke iu bashkangjitur sërish radhësve të saj. Por ç’prej orësh, ai po shihet si “i mallkuari” ndër demokratë, për shkak të deklarimit të tij hapur të votës “pro reformës së Edi Ramës”, siç komentohet politikisht.
Që pas intervistës së tij të djeshme, ku pra deklaroi se do të jepte votën e tij “pro” draftit të reformës për drejtësi, deputeti është linçuar egër në rrjetet sociale.
Përgjithësisht militantë, por dhe gazetarë e ish-zyrtarë të PD-së, kanë “lëshuar gojën”, duke sulmuar deri dhe familjen e ish-kreut të PD-së, sot deputet.
Kështu, ish-kryebashkiaku i Leskovikut, dhe njëherësh ish-gazetari me eksperiencë, Fatmir Guda, shkruan në faqen e tij në Facebook:
“Asgjë nuk është siç duket!
Nuk ka më të këqinj se zabërhanët, i tillë është!
Kur gjeti shesh, pse të mos bënte përshesh?
Ai burrë që e solli nuk ja kish borxh kupën e përmbysur, por sigurisht bashkë me dorëheqjen e tij nga kryetar të PD, pranoi edhe fajin për pisat që bënë pis listat.
O qarrata, po mandatin e more në emër të PD dhe Sali Berishës!
O mosmirnjohës, po votat demokratët ia dhanë PD dhe Sali Berishës!
O soji më i neveritur i politikës djathtas e majtas qofshi, po pse ne të tjerët nuk e dashkemi Amerikën? Shumë më shumë se ty, bindu!
O Edi i “PD-së”, ti kot sa ndyve gojën e “i qave hallin” Bashës!
O burri i Ilva Tares (në fakt me këtë t’i kam thënë të gjitha)”!
Ndërkaq, gazetari Armand Maho, i cili ka punuar si redaktor politike në disa media në vend, por që njihet si përkrahës i PD-së shkruan:
“Heeee gjetja, ai qe nuk thirrej, ai qe kerkohej perhere llogari pse e perzune, ky vizionari strategu… He sharlatan burre, ske fol asnje fjale tre vjet ne kuvend tashi kerkon me bo pazarxhiun. Yt plere”.
Eduard Selami, në intervistën e dhënë për VOA-n, tregoi se baza dhe shumica e Partisë Demokraike kërkon ta votojë reformën në drejtësi dhe ia vuri fajin Lulzim Bashës se nuk ka qenë serioz në negociata.
Sipas Selamit, kryesia dhe grupi i PD-së mbështeti në unanimitet Bashën për çështjen e rekomandimit të Venecias, por pas ardhjes së zonjës Nuland kjo gjë u zgjidh dhe gjithçka ndryshoi, duke i ofruar opozitës një garanci që ka të njëjtin numër të barabartë me PS-në në komisionin e vettingut. Selami deklaroi se më 21 korrik ajo do ta votojë dratin e reformës për drejtësi së bashku me propozimin e zonjës Nuland.
***
Ky linçimi i dytë i Eduart Selamit pas atij të vitit 1995, kohë kur doli kundër Berishës, e që e pagoi më pas me largim nga partia, e Shqipëria gjithashtu. Atëbotë nuk ekzistonin rrjetet sociale, dhe shumë gjëra konsumoheshin në faqet e shtypit. Por dhe aty nuk mungonin akuzat për bukëshkalësi. /tesheshi.com/
