Pas deklaratave që Renato Myrtaj, djali i të ndjerit Faik Myrtaj, i cili humbi jetën gjatë protestës së “21 janarit”, ka bërë disa ditë më parë, duke u shprehur se ka prova të rëndësishme për këtë ngjarje, në drejtim të tij ka ardhur një letër kërcënuese.
Në letër shkruhet:
“Z. Renato
Deklaratat e tua të fundit s’po shkaktojnë gjë tjetër veçse një funeral të familjes tënde. Ky paralajmërim qe me shkrim por tjetri s’do jetë kështu! Pa e bërë publike letrën, në të kundërt do harrohesh”.
Ky është teksti i letrës kërcënuese ardhur në adresë të Renato Myrtaj, shoqëruar me një kurorë me lule funerali.
Renato Myrtaj deklaroi disa ditë me parë se do të publikonte provat që kanë të bëjnë me ngjarjen e 21 janarit, ku babai i tij dhe tre persona të tjerë mbetën të vrarë, menjëherë pas vendimit të Gjykatës së Lartë, e cila nuk rihapi çështjen.
Më herët Myrtaj ka bërë me dije se provat për të cilat flet, i ka ai dhe katër persona të tjerë, identiteti i së cilëve nuk është bërë ende publik. Duke thënë se në ditët në vijim ai do të bëjë publike këto prova, ka deklaruar se ato i janë dërguar edhe Presidentit të SHBA-ve, Barack Obama.
Në një deklaratë të dhënë për A1 Report në janar të vitit 2014, Myrtaj ka akuzuar ish kryeministrin Sali Berisha për vrasjen e të atit, ndërsa ka shprehur shpresa të mëdha që ka tek kryeministri aktual, Edi Rama.
“Duke parë hapat e fundit që zoti Berisha bëri, edhe ata njerëz i ka mbrojtur shumë mirë, i ka larguar jashtë vendit, duke parë dhe sistemin e gjyqësorit që e ka bërë siç i ka dashur qejfi.. as kam për ta humbur tek ai njeri besimin, tek Kryeministri aktual. Madje as për tre muaj nuk mund të presim çudira nga kryeministri. Duke marrë një qeveri që ishte në humnerë. Çdo gjë do kohën e vet”, – ka thënë ai për A1 Report. /tesheshi.com/
