Dyshime ka pasur që nga viti 2013, por tani duket se gjërat janë formësuar dhe për të parën herë thuhet zyrtarisht nga një ministër i jashtëm shqiptar se Rusia është futur thellë në Ballkan me paratë e saj, jo vetëm në Kishën Ortodokse apo rrjete mediatike, por edhe aktivistë të shoqërisë civile e padyshim në politikë.
Ditmir Bushati e deklaroi këtë pas një vizite që zhvilloi në Shtëpinë e Bardhë dhe në Pentagon, ku ka diskutuar pikërisht për rrezikun e influencës ruse në Shqipëri, si dhe në trevat shqiptare, që po ashtu arrijnë të influencojnë në zhvillimet e Tiranës.
Gjithashtu, Bushati përmendi një frazë tjetër që ishte mjaft “dramatike” e thënë nga një kryediplomat. Ai foli për “sulmet ndaj ambasadave amerikane në rajon”, ku natyrisht në rend të parë ishte Maqedonia por edhe Shqipëria. Në të dy këto vende janë sulmuar ambasadorët e SHBA si njerëz të George Soros, nga persona të lidhur me qarqe të forta politike.
Por “sulmi” i parë që ndodhi ndaj ambasadës amerikane në Tiranë i përket pikërisht vjeshtës së vitit 2013, kur pati një aktivizim masiv të pashpjegueshëm në kontekstin shqiptar, me protesta kundër ardhjes së një arsenali kimik nga Siria për t’u demontuar në Shqipëri. Ishte e para herë kur protestohej kundër SHBA që prej rënies së komunizmit.
Po ku janë dyshimet apo faktet që amerikanët mbrojnë për ndërhyrjen ruse në trevat shqiptare dhe në Ballkan?
Përveç portalit tashmë të superpaguar Sputnik i cili në Ballkan ka penetruar nëpërmjet seksionit në gjuhën serbe, janë paguar gjithashtu edhe media shqiptare që kanë marrë donacione dhe reklama nëpërmjet organizatave të ndryshme të shoqërisë civile.
Një portal i njohur me qendër në Prishtinë dyshohet të ketë përfituar para ruse nëpërmjet këtyre kanaleve me një mision të përcaktuar: të çonte Ali Ahmetin në aleancë me Nikolla Gruevskin.
Ashtu si Soros që ka financuar disa projekte të shoqërisë civile, edhe Moska ka hedhur fonde të konsiderueshme për disa platforma “civile” që promovojnë tolerancën apo bashkëjetesën mes komuniteteve në hapësirën e ish-Jugosllavisë.
Pikërisht këtë filozofi paraqiti edhe Aleksandër Vuçiçi kur foli për një “Jugosllavi” të re si treg i përbashkët.
Dhe në këtë kontekst, disa aktivistë shqipfolës, që po flasin për një bashkëjetesë me serbët dhe kundër pavarësisë së Kosovës, po promovohen nga rusët.
Demo Berisha, është një shqiptar i lindur në Pejë, por që ka jetuar gjithë kohën në Novi Sad të Vojvodinës.
Ai drejton shoqatën “Amza e Shqiptarëve”, boton edhe një revistë, anipse me një shqipe pa drejtshkrim, dhe që është “analist” thuajse i përditshëm i Sputnik-ut në gjuhën serbe.
Shoqata e Berishës është pjesë e rrethit të organizimit të shoqërisë civile që bëjnë aktivitete për “tolerancën”.
Një aktivitet i tillë u zhvillua para ca kohësh në Gostivar, në kulmin e situatës në Maqedoni, ku me vete përveç Demo Berishës, ishte edhe djali i Titos, Josip Joshka Broz.
Dhe të gjitha këto skalione janë politikisht pranë Partisë Socialiste të Ivica Daçiçit e cila financohet dhe mbështetet hapur nga Moska.
Vetë Putin e detyroi Vuçiçin të vërë pasuesin e Milosheviçit në qeveri.
Këto grupime organizatash qeveritare nga Serbia, më pas rrëshqasin në Kosovë, Maqedoni duke financuar aktivitete e ngritur organizata të ndryshme në çdo qytet, të cilat me kohën s bëhen rrethe dhe klube të thithje të njerëzve dhe të influencës. Ka dyshime që paratë e financuara nga Moska janë kanalizuar edhe në disa OJF që reklamohen si religjioze, kryesisht sekte të veçanta gjysëm pagane.
“Në të kaluarën kemi parë sulme sporadike kundër ambasadorëve amerikanë, në Tiranë për shembull, ndërsa tani shikojmë një fushatë të orkestruar kundër rolit të ambasadave amerikane në Shqipëri, Maqedoni, Mal të Zi dhe Serbi. Kjo po bëhet mjaft e rrezikshme, sidomos në situatën me të cilët përballet Bashkimi Evropian si dhe duke mbajtur parasysh faktin që ambasadat amerikane kanë mbështetur mjaft reformat për sundimin e ligjit në vendet tona”, deklaroi Ditmir Bushati, ministri i Jashtëm shqiptar nga Uashingtoni, pikërisht pas daljes në një takim të rëndësishëm në Pentagon dhe Departamentin e Shtetit.
Dhe ka shumë gjasa që Uashingtoni nuk do ta falë sulmin e bërë ndaj Donald Lu-së si përfaqësues i SHBA. Dhe pritet të reagojë së shpejti. Ndoshta pas zgjedhjeve./tesheshi.com/
