Kreu i koalicionit “Bardh e Zi”, Dritan Abazoviç, i tha tabloidit serb Kurir, një media e afërt me Vuçiçin, se ëndrra e tij ishte të anëtarëonte Malin e Zi në Bashkimin Evropian.
Duke folur për formimin e qeverisë, ai vuri në dukje se gjendja e këtij koalicioni është një qeveri eksperte dhe se regjimi do të bëjë gjithçka. “Mafia do të bëjë gjithçka për të parandaluar që ajo të ndodhë”, theksoi ai.
“Ata do të përpiqen në çdo mënyrë të provokojnë incidente. Detyrimi ynë është të tregojmë mençuri, përgjegjësi. Në këtë moment, vetëm mafia dhe krimi i organizuar janë mundur. Qytetarët e asnjë organizate fetare, kombëtare, politike nuk duhet të kenë një ndjenjë të humbjes,” tha Abazoviç për Kurir.
Abazoviç tha se njerëzit që duan ndryshim votuan për platformën “Bardh e Zi”.
“Platforma jonë është e qartë që nga fillimi, e njerëzit që duan ndryshim kanë votuar për ne, ndryshimi ka ndodhur dhe ne nuk do ta lëshojmë atë. Pavarësisht qindra telefonatave, pavarësisht mijëra mesazheve që kam marrë në periudhën e mëparshme, pavarësisht thirrjeve nga bashkësia ndërkombëtare, thirrjeve nga kolegët e mi nga rajoni, unë premtoj se Dritan Abazoviç dhe koalicioni ‘Bardh e Zi’ nuk do t’i nënshtrohen asnjë presioni. Dritani kurrë nuk ka tradhtuar asgjë ose askënd dhe se për gjithçka që ai ka thënë në jetën politike ka qëndruar vazhdimisht pas saj,” tha Abazoviç.
Kur u pyet se sa e vështirë do të jetë formimi i një qeverie të re, Abazoviç u përgjigj:
“Do të jetë e vështirë. Do të jetë sfiduese sepse ndryshimet po ndodhin për herë të parë. Eshtë e sigurt që do të jetë një rrugë me gjemba…Unë nuk do të doja që qytetarët të kishin pritshmëri që kjo të ndodhte brenda natës dhe se do të ndodhte menjëherë. Vendimet e duhura duhet të merren në kohën e duhur. Koha kërkon mençuri, pasi qeveria do të provojë gjithçka për ta sabotuar atë … Jam i sigurt se në fund të fundit do të kemi sukses dhe do t’i bëjmë qytetarët të lumtur”, theksoi politikani shqiptar i Malit të Zi.
Kreu i koalicionit “Bardh e Zi” tha se me kënaqësi do të vinte në Beograd dhe çdo qytet tjetër në rajon.
“Unë do të jem i lumtur të vij në Beograd, ashtu si jam shumë i lumtur të udhëtoj në të gjitha vendet në rajon. Unë pres që të takoj njerëz, kemi nevojë për më shumë pajtim. Unë mendoj se po jap një kontribut të madh për këtë. Eshtë më mirë të tregohet me shembuj se njerëzit nuk po grinden, por që qeveria i ndan njerëzit për interesa personale. Nëse punojmë më shumë për integrim, do ta kuptojmë lehtësisht njëri-tjetrin. Ne nuk po luftojmë për shqiptarët, serbët, malazezët, por për njerëzit. Marrëdhëniet midis Malit të Zi dhe Serbisë janë të tensionuara sepse ishte në interes të partisë që ka qenë në pushtet deri më tani”, tha Abazoviç. /tesheshi.com/
