Në një intervistë për Deutsche Welle-n, kreu i Komisionit Europian, Jan Claude Juncker, ka sqaruar statusin e tij në turin e vizitave që kreu në Ballkan, ku ishte dhe në Tiranë.
Ai veçoi Shqipërinë, ku tha se nuk e kishin kuptar lidhur me misionin e tij. Adresimi duket të jetë për Tiranën zyrtare, më saktë qeverinë e saj dhe kryeministrin Rama.
“E gjitha varet nga substanca dhe jo nga përfytyrimet kalendarike. Mua më interesojnë afatet, por jo që prej tyre të harrohet thelbësorja. Këtë e kuptuan në Maqedoni, ndërsa në Shqipëri disi më pak, sepse Shqipëria ende nuk i ka nisur negociatat”, tha zyrtari i lartë i Brukselit.
“Lidhur me këtë do t’i japim rekomandimet tona në prill, unë nuk mund ta parashikoj nga këndvështrimi i sotëm sesi do të jenë këto rekomandime, sepse duhen bërë përparime thelbësore. Do të na duhet të verifikojmë që tani deri në prill, nëse do të ketë përparime të mjaftueshme e substanciale”, shtoi Juncker, duke përcjellë një mesazh se çfarë pret Brukseli nga Tirana.
“Në Shqipëri duhet të arrijmë shumë përparime, sepse hasim intensivisht probleme me kriminalitetin e organizuar brenda vendit, por dhe si një artikull eksporti jashtë kufijve”, shtoi Juncker, një fjali kjo e fundit që duket të jetë e papreferueshme për kryeministrin Rama. /tesheshi.com/
