Sfidues në fjalor e gjeste, si kurrë më parë, kreu i shtetit Ilir Meta ka vendosur që dhe njëherë të nxjerrë dhëmbët e tij prej politikani të sprovuar në beteja, kësaj here jo thjesht të brendshme por dhe me ndërkombëtarët.
Dy ditë pas triumfit të 30 qershorit si datë ku u zhvilluan zgjedhjet vendore, edhe me një diktat amerikan, Meta doli dhe e sulmoi qeverinë, gjithashtu dhe ndërkombëtarët, duke patur si kartë kryesore Sorosin. Sipas tij, pas Ramës qëndron miliarderi hungarezo-amerikan, një teori kjo konspirative që ka bashkëshoqëruar vitet e demokracisë, e që ngriti krye gjatë Reformës në Drejtësi, ku pikërisht nga LSI u investua që reforma të “ndyhej” me emrin e Sorosit.
“Kam dy fjalë edhe për Soros. Ma tha Orbani: ‘kini kujdes se nuk aq demokrat sa duket dhe shpesh komploton kundër Shqipërisë’. Unë do t’i them Sorosit dhe të birit që vjen shpesh në Shqipëri se presidenti Ilir Meta nuk është i racës së Gruevskit. Unë jam gati të bëj testin e shëndetit mendor, jam i gatshëm të bëj edhe testin e drogës, ndërsa për testin e shqiptarit e dinë që e kam bërë dhe do ta bëj në çdo kohë”, tha Meta.
Më i ashpër se kurrë, ai kërcënoi, nën nëntekst ndërkombëtarët, që mos guxojnë, siç tha, ta provojnë kokëfortësinë e tij.
“Është mirë të mos e provojë askush kokëfortësinë time për mbrojtjen e interesave të Shqipërisë. Nuk jam vetëm. Janë shumë shqiptarë…”, ishin fjalët e presidentit.
Komentetb e tij u bënë teksa tha se ai e ka një propozim për zgjidhjen e krizës.
“Në 13 tetor, edhe zgjedhje të përgjithshme, edhe vendore dhe unë garoj për president. Kjo është rruga që e zgjidh këtë krizë që shqiptarët të mos shkojnë sërish të futen nëpër ambasada”, theksoi kreu i shtetit.
Meta ushqeu sërish një teori konsiprative, kur aludoi se pas shefit të qeverisë qëndrojnë, siç tha PPPD-të.
Ndërsa sa i takon planit të mazhorancës për ta shkarkuar, Meta u përbetua se kjo nuk do të ndodhë.
“Ai vetëm presidentin nuk e merr dot dhe nuk ka për ta marrë ndonjëherë”, theksoi kreu i shtetit.
“I kam bërë të qartë zotit Basha, Kryemadhit, mikut tim doktorit të mos bien pre e provokimeve të një grupi të strukturuar PPPD që punon sipas parimeve të Deep State që synon kapjen e shtetit dhe kanë gjetur njeriun e duhur për këtë çështje që nuk vjen në takim me presidentin por lahet në pishinë. edhe pse presidenti i ka treguar rrugën e zgjidhjes”, tha Meta, duke bërë më pas dhe zbërthimin e ankronimit: Politikanët – Propaganda – Policia – Diplomatët. /tesheshi.com/
