Qeveria polake akuzon presidentin e Këshillit Europian, Donald Tusk se po sulmon Poloninë, pasi ky i fundit artikuloi alarmin për politikat e qeverisë së Varshavës. “Sot, duke përdorur pozicionin e tij për të sulmuar qeverinë polake, ai po sulmon Poloninë”, shkroi në rrjetet sociale, kryeministrja Beata Szydlo. Qeveria nacionaliste që ajo drejton është në pushtet prej dy vjetësh.
Më herët, Tusk, ish-kryeministër i Polonisë e lidhi qeverinë e saj me një “plan të Kremlinit”, por pa shkuar më tej. Dy liderët kanë qenë rivalë prej kohësh.
Partia Ligj dhe Drejtësi e kryeministres Szydlo ka hyrë në konflikt me Komisionin Europian në disa fronte: për shkak të refuzimit për të pranuar refugjatë sipas skemës së rialokiimit të BE-së si dhe rregullimeve ligjore që ndërhyjnë në median dhe sistemin gjyqësor të vendit. Komisioni akuzon partinë në pushtet se po vë në rrezik vlerat e BE-së për sundimin e ligjit.
Të dielën Tusk, liberal i qendrës së djathtë shkroi në rrjetet sociale: “Alarm, konflikti i ashpër me Ukrainën, izolimi brenda Bashkimit Europian, largimi nga sundimi i ligjit dhe pavarësia e gjyqësorit, sulm mbi sektorët jo-qeveritarë dhe median e lirë. A është kjo strategji e partisë Ligj dhe Drejtësi apo plan i Kremlinit? Shumë të ngjashme për të na zënë gjumi të qetë”.
Javën e shkuar, Parlamenti Europian miratoi një rezolutë shumë kritike ndaj qeverisë polake. Referenca e Tusk ndaj Kremlinit duket se lidh partinë polake me ndërhyrjen ruse në disa vende të BE dhe Ukrainë.
Më parë, Polonia ka qenë një prej zërave më kritikë ndaj Rusisë që kur Moska aneksoi gadishullin e Krimesë nga Ukraina në vitin 2014 dhe mbështeti kryengritësit separatistë në lindje të Ukrainës.
Edhe zyrtarë të tjerë polakë kanë reaguar me zemërim ndaj Tusk, duke e quajtur postimin e tij një klithmë të dëshpëruar frustrimi. /tesheshi.com/
