Prokuroria dhe Policia e Vlorës thanë se kanë prova të mjaftueshme kundrejt Fredi Belerit, me akuzën se ky i fundit, kandidat i BF-së për Himarën, ka tentuar blerje votash.
Në një konferencë për shtyp lidhur me këtë zhvillim delikat pak ditë para zgjedhjeve, instancat ligjzbatuese thanë se “nga aktet e administruara deri më tani në funksion të hetimit për këtë procedim penal, nga strukturat hetimore të Drejtorisë Vendore të Policisë Vlorë janë referuar në Prokurorinë pranë Gjykatës së Shkallës së Parë Vlorë, informacione në lidhje me disa shtetas të dyshuar të përfshirë në veprimtarinë e kundërligjshme të shit-blerjes së votës, për zgjedhjet vendore të datës 14 maj 2023, në qytetin e Himarës dhe në fshatrat që janë pjesë e bashkisë Himarë, duke iu ofruar qytetarëve të ndryshëm, shuma të caktuara parash kundrejt dhënies së votës për një nga kandidatët konkurues”.
Për ta vërtetuar këtë, janë futur në punë “metodat speciale” të hetimit, më saktë një bashkëpunëtor apo ndryshe një agjent, nga i cili janë siguruar provat, siç është lënë e nënkuptuar.
“Pas regjistrimit të procedimit penal, nga ana e prokurorit është autorizuar kryerja e një sërë veprimesh procedurale në terren, me anë të përdorimit të metodave speciale të hetimit, me qëllim konstatimin e faktit penal për të cilin është regjistruar ky procedim penal”, thuhet në deklaratë, gjë që është finalizuar me arrestimet përkatëse. “Bazuar në faktet e mbledhura gjatë hetimit dhe në provat e siguruara në dinamikë, me anë të përdorimit të metodave speciale të hetimit, në kuadër të operacionit policor të koduar ‘Matrix’, është bërë në arrestimi në flagrancë i shtetasve: Dh. B. alias A. B., 51 vjeç, dhe P. K., 44 vjeç, për veprën penale ‘Korrupsion aktiv në zgjedhje’, kryer në bashkëpunim, parashikuar nga neni 328, 25 i Kodit Penal. Në cilësinë e provës materiale është sekuestruar një shumë monetare prej 40 000 lekësh të rinj. Hetimet vazhdojnë”. /tesheshi.com/
