Në strategjinë e mosndërhyrjes por të bërë të qartë të qëndrimeve, SHBA kanë përcjellë mesazhin se njohin 30 qershorin si datë legjitime zgjedhjesh. Kjo goditje e Uashingtonit ndaj Metës, pra aktit të tij të papreçedentë të ç’dekretimit të zgjedhjeve, ka ardhur sa e qartë aq dhe e kamufluar, brenda një mesazhi kushtuar protestës së paralajmëruar të opozitës.
Duke marrë shkas dhe nga aksioni i opozitës jashtëparlamentare PD-LSI me sulmin e dhunshëm ndaj KZAZ-ve që punojnë për 30 qershorin, Ambasada Amerikane në Tiranë përcolli njëherësh paralajmërimin se ushtruesit e dhunës duhet të mbajnë përgjegjësi ligjore.
“Shtetet e Bashkuara duan atë që meriton populli shqiptar, sundim të ligjit që mbron punonjësit civilë dhe shkollat nga sulmet e pakuptimta, që mbron integritetin dhe sigurinë e procesit zgjedhor, dhe që mban premtimin e së drejtës së qytetarit për të protestuar paqësisht ndërkohë që bën që ata që përfshihen në dhunë të mbajnë përgjegjësi. Nxisim të gjithë qytetarët dhe të gjitha institucionet kudo në Shqipëri që të mbështesin parimet e sundimit të ligjit, të refuzojnë dhunën në të gjitha format e saj, si dhe të ushtrojnë paqësisht të drejtat e tyre demokratike ndërkohë që lejojnë bashkëqytetarët e tyre të bëjnë të njëjtën gjë”, thuhet në deklaratën e Ambasadës Amerikane.
E gjitha kjo sqaron më së miri dhe këmbënguljen e mazhorancës për zgjedhje më 30 qershor, shoqëruar nga përbetimi i Ramës se nuk do mund të ndalohen. Pas tij, edhe pse pa ndërhyrje të drejtpërdrejt, ekziston një mbështetje ndërkombëtare.
Ndërsa sa i përket protestës të së premtes, Uashingtoni sërish apelon për mospërdorim dhune, duke u kujtuar organizatorëve se do mbajnë përgjegjësi.
“Po ashtu, iu bëjmë thirrje organizatorëve të protestës së nesërme që të mbajnë përgjegjësi përballë po të njëjtave parime, t’iu bëjnë thirrje publikisht mbështetësve të tyre të mblidhen paqësisht si dhe të refuzojnë energjikisht dhunën në çdo mundësi”, thuhet në deklaratën e Ambasadës Amerikane, dalë në orët e mbrëmjes. /tesheshi.com/
