Nga Blendi Gashi
Ministrat serbë të kabinetit qeveritar “Mustafa” vazhdojnë të fyejnë pothuajse çdo institucion të shtetit nga i cili marrin paga të majme dhe mbajnë poste kyçe.
Është sërish zv. kryeministri nga Lista Serbe, Branimir Stojanoviq, i cili së fundmi ka bërë deklarata fyese ndaj institucionit më të besueshëm në vend, Policisë së Kosovës.
E ka quajtur të paaftë e të painteresuar që të mbrojë serbët, dhe i ka bërë thirrje KFOR-it që të vë një postbllok në fshatin Paralovë të Novobërdës, siҁ ka thënë, t’i mbrojë njerëzit atje.
Këtë deklaratë ai e bazon në, siç thotë ai, sulmet e fundit që po ndodhin në vazhdimësi në atë pjesë të vendit.
“Jemi të alarmuar nga sulmet e fundit, të cilat po ndodhin në vazhdimësi. Më së shumti jemi të habitur me paaftësinë, ndërsa tani dyshojmë në bashkëfajësinë e policisë në maltretimin sistematik që po u bëhet qytetarëve të fshatit Paralovë.
Deri tani, të gjitha kërkesat time të mëhershme që ia kam drejtuar drejtorit të policisë, po shihet se nuk kanë gjetur mirëkuptim. Për këtë arsye më nuk pres asgjë nga policia në rajonin e Gjilanit, veçanërisht nga ajo në Novobërdë”, ka theksuar Stojanoviq.
Edhe përkundër kësaj deklarate të Stojanoviqit i cili e quan të paaftë policinë e shtetin tonë, asnjë reagim nuk ka ardhur nga Ministria e Punëve të Brendshme që udhëhiqet nga Skënder Hyseni, por as nga drejtori i policisë, Shpend Maxhuni.
Ministri Hyseni ka zgjedhur heshtjen, njëjtë siç bën çdo herë edhe shefi i tij Isa Mustafa kur janë në pyetje deklarimet e bëra nga minitrat serb.
Policia e Kosovës: mbrojmë pa dallime të gjithë qytetarët
Portali tesheshi.com për çështjen në fjalë ka kontaktuar Policinë e Kosovës, ku ka marrë një përgjigje nga zyra për media e këtij institucioni.
Policia e Kosovës, duke mos mos dashur të komentoj deklarimet e Stojanoviqit thotë se janë institucion i zbatimit të ligjit, dhe se veprimet e tyre udhëhiqen nga parimet e trajtimit të barabartë dhe të drejtë të të gjithë qytetarëve pa dallime.
“Policia e Kosovës ka aftësi dhe profesionalizëm të lart në realizimin e detyrave dhe obligimeve të saja ligjore, në ruajtjen e rendit dhe sigurisë publike, në ofrimin e sigurisë ndaj të gjithë qytetareve të sajë duke përfshirë edhe ruajtjen e pronës publike dhe asaj private.
Referuar punës, rezultateve pozitive dhe bashkëpunimit me qytetarë Policia e Kosovës njihet si institucioni me i besuar dhe kredibil në vend nga të gjitha komunitet, përfshirë edhe organizata të ndryshme vendore dhe ndërkombëtare.
Vlen të potencohet se PK-ja ne kuadër të strukturimit të sajë ka të inkuadruar komunitete të ndryshme dhe kryesisht të njëjtit i ka të caktuara në realizim të detyrave në zonat e caktuara të komuniteteve që i përkasin me qëllim të lehtësimit të komunikimit dhe bashkëpunimit të ndërsjellët”, thuhet në përgjigjen e dhënë me shkrim për portalin tesheshi.com nga zyra për media e policisë.
Më tej, policia thotë se respekton të drejtat e njeriut, lirinë themelore, paanshmërinë dhe neutralitetin në realizimin e detyrave në mënyrëgjithëpërfshirëse, meritore dhe pa diskriminim, duke reflektuar karakterin shumetnik në Republikën e Kosovës, duke i njohur parimet e barazisë gjinore dhe të drejtat e njeriut pa dallime race, feje apo gjinie.
“Zyrtarët policor ushtrojnë autorizimet e tyre dhe kryejnë detyrat në mënyrë të ligjshme, bazuar në Kushtetutë dhe në ligjet e aplikueshme në fuqi, në gjithë territorin e Republikës së Kosovës duke përfshirë edhe zonat e përfshira me komunitete të ndryshme.
Policia e Kosovës ç’do herë ka qenë, është dhe do të jetë e gatshme që të realizoj të gjitha detyrat dhe obligimet e saja ligjore drejt të gjithë qytetarëve të sajë pa dallime”, thotë policia për tesheshi.com.
Ndaj deklarimeve të Stojanoviqit ka reaguar dega e LDK-së në Novobërdë, duke e quajtur deklaratën nxitëse, për, siç është thënë, ndarje ndëretnike.
Ndryshe, agjencia serbe e lajmeve Beta ka raportuar se të dielën pasdite është sulmuar qytetari Dragan Stojkoviq nga vëllezërit Ibishi. /tesheshi.com/
