Nga Blendi Gashi
Kryeministri Isa Mustafa ka “kërcënuar” Bashkimin Evropian se nuk do të ketë vazhdim të dialogut pa ndodhur liberalizimi i vizave për kosovarët.
Ai në një intervistë dhënë për Dojçe Vele ka thënë se drejtuesit e institucioneve shtetërore nuk mund të shëtisin nëpër Evropë për të dialoguar për Kosovën, përderisa qytetarët mbesin të izoluar.
“Kjo do të ishte jo etike. Ndaj ne kërkojmë një përgjigje të qartë të BE, se çfarë do të ndodhë me liberalizimin e vizave. Ne do të bëjmë përpjekje të marrim një përgjigje nga Bashkimi Evropian se çfarë do të ndodhë me vizat. Ndryshe do ta kemi shumë vështirë që të marrim pjesë në proceset e mëtutjeshme”, ka deklaruar Mustafa.
Por si e shohin disa analistë kushtëzimin e bërë BE-së nga kryeministri Isa Mustafa?
Nexhemedin Spahiu thotë për tesheshi.com se kushtëzimi i vazhdimit të dialogut me liberalizim vizash nga ana e kryeministrit të Kosovës është idiotizëm kulmor.
“Nuk do të kishte fare bisedime në Bruksel sikur Perëndimi (SHBA e Bashkimi Evropian) nuk do t’i bënin presion Beogradit. Dialogu me Beogradin është interes i Kosovës. Është tjetër gjë që Qeveria e Kosëovës, nuk po di ta shfrytëzojë këtë, e për më tepër po nxjerr rezultate negative prej këtij dialogu. Kjo është sikur një studenti që i jepet bursa dhe mundësia për të studiuar, por në vend se ta shfrytëzojë këtë mundësi, ai jo vetëm që nuk kryen fakultet dhe e harxhon kohën kot po edhe sjellë bela në shtëpi”, ka deklaruar Spahiu.
Analisti tjetër, Faik Krasniqi, në një prononcim dhënë për tesheshi.com deklaratat e kreut të ekzekutivit i quan të pamatura dhe të bëra për të fituar poena politik.
“Kushtëzimet edhe pse të vonuara, është dashur të ndodhin para fillimit të bisedimeve me Serbinë. Dhe ato duhet të bëhen në Bruksel, atje ku bisedimet me Serbinë janë duke u zhvilluar tash e sa vite, ku nga ato bisedime Kosova nuk përfitoi asgjë, por vetëm i bëri ndere e favore Serbisë”, ka deklaruar Krasniqi.
Blerim Burjani, njohës i rrethanave politike ka deklaruar për tesheshi.com se drejtuesit e vendit ditëve të fundit kanë forcuar retorikën andaj deklaratën e fundit të Mustafës e sheh si formë të presionit politik.
“Kjo demonstron edhe lodhjen politike të institucioneve të shtetit për tu ballafaquar me qytetarët të cilët e dëshirojnë progresin. Tani po hyjmë në një fazë ku të gjithë qytetarët pa kushtëzime kërkojnë liberalizimin e vizave.
Megjithatë, Mustafa me deklaratën e tij nuk ka thënë qartë se nuk do të shkoj në dialog, pasi dihet se dialogu me Serbinë është i domosdoshëm”, ka deklaruar Burjani.
/tesheshi.com/
