Nga Mensur Krasniqi
Paksa i trembur, por që në njëfarë mënyre mblodhi guximin pas gjithë atyre ndodhive të tmerrshme për shqiptarët e rajonit të Karadakut, kreu i BDI-së, Ali Ahmeti, ka vizituar një nga fshatrat e kësaj ane, Mateqin. Mirëpo, i ballafaquar me praninë e ulët të pjesëmarrësve në tubimin e tij, ai pranoi fajin se kjo ishte një pasqyrë shqetësuese si pasojë e shpërnguljes masive të rinisë nga Maqedonia për shkak të mungesës së investimeve.
“Ato shtatore, ato shkolla që po ndërtohen, ato universitete duan të rinj, duan studentë dhe si do të qëndrojnë njerëzit këtu duke mos ju ofruar perspektivë”, tha Ahmeti si të ishte në opozite e jo në pushtet prej vitesh, duke shkaktuar shastisje e pështjellime në opinionin maqedonas.
Madje me këtë deklaratë të Ahmetit janë habitur edhe oponentët e tij nga tabori kundërshtar, duke hapur dilemën nëse kreu i BDI-së është i vetëdijshëm apo jo se është pjesë e pushtetit prej vitesh.
Sipas nënkryetarit të Lëvizjes BESA, Zeqirija Ibrahimi, nëse dikush dëshiron ta kuptojë se çka është matufosja, ky është Ali Ahmeti.
“Ndonëse ai është përgjegjësi kryesor që e ka zbrazur dhe lënë të shkretë Likovën(Karadakun), si një plak matuf ai mburret që e ka konstatuar këtë. A ta vajtosh a të tallesh me të? Por, meqë situata është më serioze se matufosja e Ali Ahmetit dhe deklaratat e tij joserioze, më mirë është mos të merret kush me ato deklarime. E vërteta është e hidhur dhe dhimbshme: Likova është rajoni më i pazhvilluar i shqiptarëve të Maqedonisë, shpërngulja është marramendëse, pikërisht sepse partia e z. Ahmetit nuk ka krijuar asnjë perspektivë zhvillimore atje, andaj është bërë detyrimi më i lartë patriotik të ndërhyhet me urgjencë në Likovë, që të mund të shpëtohet ajo që ka mbetur në zonë”, deklaroi për tesheshi, Zeqirija Ibrahimi.
Megjithatë, Ibrahimi shprehet i bindur se shqiptarët tani më nuk i duan reprizat e mërzitshme dhe e kanë të qartë se nuk ia vlen edhe një herë të mashtrohen. Prandaj 11 dhjetori është një referendum veçmas për popullatën e Likovës, se a dëshiron të dëgjojë pleq të matufosur apo të shohë zhvillim dhe perspektivë për të ardhmen e asaj popullate.
Nga ana tjetër, anëtari i kryesisë qendrore të Rilindjes Demokratike Kombëtare, Vigjilent Leka ka ironizuar me liderin e BDI-së, duke pranuar se Ahmeti ka një përvojë të madhe politike, dhe është nuhatës i mirë i dështimit dhe sukseseve, ku për dallim nga ciklet e kaluara zgjedhore ai fliste si baba i kombit i sigurtë për fitoret e tij, sigurisht të manipuluara, por që sot me këtë deklaratë nuk shfaqet si i tillë, por si një politikan i konsumuar.
“Ai tani është një lider që e ka kapluar panika, ku retorika e tij nacionaliste dhe shqiptaromadhe nuk shkon te veshi i qytetarit të shkatëruar ekonomikisht, një lider që ka një listë të gjatë të bashkëpuntorëve të tij që po hetohen për keqpërdorime të të ardhurave publike, skandale të panumërta, dështime ne çdo sferë, mosrealizim total i premtimeve dhe në fund është e pritshme rrëshqitja e tij publike duke treguar të vërtetën me gojën e vet. Në tubimin që e organizoi në Mateç të Likovës duke mbledhur banorët e gjithë atij rajoni ai pranoi që rinia po ik nga vendi shkaku i mungesës së investimeve, kjo është në rregull, por i lartëpërmenduri harroi që nuk përfaqëson opozitën por si pjesë e pushtetit është direkt përgjegjës për ndodhjen e këtyre fenomeneve”, deklaroi për portalin tesheshi, Vigjilent Leka.
Po ashtu sipas Lekës, Ahmeti edhe pse Kumanovën e sidomos Sllupçanin e Lagjen e Trimave i viziton rrallë e hiç, ai harron se ishin pikërisht ata njerëz të këtyre vendbanimeve që dhanë shumë për një jetë më të mire dhe që ngritën kultin e tij personal. Dhe ashtu sikurse e ngritën rajoni i Karadakut, ashtu do ta poshtërsojnë në ditën e zgjedhjeve Ali Ahmetin së bashku me garniturën e tij.
“Duke i kujtuar gjithë këto ngjarje gafet politike janë të pashmangshme. Nga ana tjetër realiteti politik është në fazën e ndryshimeve, opozita po kosolidohet, sondazhet ndërkombëtare tregojnë për një rënie drastike të partisë në pushtet dhe si kundërvlerë rritjen e vetëdijës qytetare të priur për ndryshime. Z. Ahmetit nuk i ka mbetur asgjë tjetër veçse të tenton për tu martirizuar si viktimë e një armiku imagjinar, që realisht nuk ekziston”, përfundoi Leka.
Përveç kundërshtarëve politikë, kjo gafë e Ali Ahmeti ka tërhequr vëmendjen edhe të opinionit të gjërë në Maqedoni, duke e cilësuar si “vetëvrasje” dhe “autogol”, ndërsa autorin – Ali Ahmetin pra – si “analisti politik”. /tesheshi.com/
