E ardhmja e Bashkimit Evropian varet pjesërisht nga pranimi i anëtarëve të rinj, veçanërisht i vendeve të Ballkanit Perëndimor, tha Presidenti sllovak Peter Pelegrini.
“E di sa i rëndësishëm ishte anëtarësimi në BE për Sllovakinë. Planifikoj të vizitoj gradualisht të gjitha vendet e Ballkanit Perëndimor për t’i mbështetur ato në këtë rrugë, me kusht që të përmbushen të gjitha kushtet”, tha Pellegrini.
BE-ja përballet me një periudhë sfiduese
Ai vuri në dukje se Bashkimi Evropian përballet me një periudhë sfiduese në të cilën do të duhet të mbështetet më shumë në burimet e veta, qoftë në forcimin e konkurrueshmërisë, qëndrueshmërisë apo në sferën ekonomike. Ai e tha këtë gjatë një takimi me ushtruesin e detyrës së kreut të Përfaqësisë së Komisionit Evropian në Sllovaki, Radim Dvoržak, me rastin e shënimit të 21-vjetorit të anëtarësimit të Sllovakisë në BE.
Pellegrini theksoi se anëtarësimi në BE dhe NATO është një nga sukseset më të mëdha të vendit, si dhe se shumica e qytetarëve sllovakë mbështesin anëtarësimin në BE, por ai paralajmëroi se kjo mbështetje “nuk duhet të merret si e mirëqenë“.
“Është e rëndësishme që ne të nxjerrim në pah vazhdimisht aspektet pozitive të anëtarësimit tonë në bashkësinë evropiane. Njerëzit duhet të jenë të vetëdijshëm për avantazhet që na ofron BE-ja, por në të njëjtën kohë ne duhet të njohim edhe kontributin e rëndësishëm të Sllovakisë në të ardhmen e Evropës”, tha Pellegrini.
Ai përshëndeti qasjen e Presidentes së Komisionit Evropian, Ursula von der Leyen, ndaj inovacionit dhe inteligjencës artificiale, të cilën e përshkroi si thelbësore për të ardhmen dhe konkurrueshmërinë e BE-së. /tesheshi.com/
