Zgjedhjet mund të kenë mbaruar në Holandë, udhëheqësit europianë mund të jenë të kënaqur me rezultatin e tyre, por në Turqi ende mëria ndaj sjelljes së papranueshme holandeze është fort e pranishme.
Incidentet e fundjavës zënë vend të parë në ligjërimet e shtetarëve turq, duke nisur nga presidenti i vendit.
“Mark Rutte, ju fituat zgjedhjet, por humbët një mik si Turqia,” ishte nga Sakarja reagimi i Erdoğan-it mbi zgjedhjet në Holandë.
Por më e fortë ka qenë një deklaratë e ministrit të Jashtëm turk, e para e këtij lloji, një paralajmërim drithërues.
Në Antalja, atje ku gjendej sot në kuadër të fushatës për “po”-në në referendumin për ndryshimet kushtetuese, Mevlüt Çavuşoğlu ka bërë një deklaratë bombë, duke paralajmëruar për nisjen së shpejti të luftërave fetare në Europë.
“Tani zgjedhjet kanë mbaruar në Holandë. Kur hidhni sytë në partitë, ju nuk shihni ndryshim midis socialdemokratëve dhe fashistit Wilders. Të gjithë kanë të njëjtën mendësi. Ku do të shkoni? Ku po e çoni Europën? Ju keni filluar ta shembni Europën. Po e çoni Europën në humnerë. Luftëra fetare do të fillojnë shpejt në Europë.”
Kjo është deklarata më tronditëse e bërë deri më sot për atë çka e pret Europën në të ardhmen e afërt. /tesheshi.com/
