Ekspertët paralajmërojnë se refugjatët do të llogariten me dhjetëra milionë në dekadën e ardhshme dhe bëjnë thirrje për një kornizë ligjore që të mbrojë shtresat më të prekura.
Me dhjetëra milionë njerëz do të detyrohen të lënë shtëpitë e tyre për shkak të ndryshimeve klimatike, në dekadën e ardhshme, duke krijuar krizën më të madhe të refugjatëve që ka parë bota ndonjëherë. Kështu bëhet e ditur në një raport të ri, ku përfshihet edhe mendimi i autoriteteve ushtarake.
Kështu, ekspertë të lartë të ushtrisë amerikane dhe ata të sigurisë thanë për Fondacionin e Drejtësisë Mjedisore, se numri i refugjatëve do të lërë në hije numrin e atyre që iu larguan konfliktit sirian, duke sjellë sfida të jashtëzakonshme për Europën.
“Nëse Europa mendon se ka një problem me emigracionin sot …të presë 20 vjet”, tha gjenerali amerikan në në pension, Stephen Cheney. “Do të shihni se çfarë ndodh kur ndryshimet klimatike të largojnë njerëzit nga Afrika, nga zona sub-sahariane- dhe nuk po flasim tani për një apo dy milionë, por për 10 apo 20 milionë. Ata nuk do të shkojnë në jug të Afrikës, ata do të kapërcejnë Mesdheun”.
Studimi i publikuar në media apelon qeveritë të merren vesh për një kornizë të re ligjore për të mbrojtur refugjatët e klimës dhe, në prag të një samiti për klimën në Gjermani, apelohen liderët të bëjnë më shumë për të zbatuar objektivat e marrëveshjes së Parisit.
David King, ish-këshilltari shkencor pranë qeverisë britanike, tha për fondacionin: “Ajo për të cilën ne flasim është një kërcënim ekzistencial ndaj civilizimit tonë në terma afatgjatë. Në terma afatshkurtër, mbart të gjitha llojet e rreziqeve dhe kërkon përgjigje njerëzore në një shkallë që nuk është njohur më parë”.
Raporti argumenton se ndryshimet klimatike luajtën rol në rrjedhën e luftës siriane, me thatësirat e njëpasnjëshme që sollën rreth 1 milion e gjysmë njerëz drejt qendrave urbane midis viteve 2006 dhe 2011. Shumë prej këtyre njerëzve nuk kishin akses të mirë në ushqim, ujë dhe vende pune.
“Ndryshimet klimatike janë ingredient i paparashikueshëm që, kur u shtohet tensioneve ekzistuese sociale, ekonomike dhe politike, ka potencialin të shpërthejë dhunë dhe konflikt me pasoja katastrofike”, thuhet në raportin e Fondacionit për Drejtësi Mjedisore.
“Në botën tonë, ndryshimet klimatike – dhe potenciali i tyre për të nxitur si konflikte të dhunshme ashtu edhe emigracion masiv – kanë nevojë të merren në konsideratë si prioritet urgjent nga politikbërësit dhe liderët e biznesit po ashtu”.
Edhe pse raporti nënvizon ndikimin në rritje të ndryshimeve klimatike për popujt në Lindjen e Mesme dhe në Afrikë, në të thuhet se gjurmë të ngjashme – si uraganët që shkatërruan pjesë të Amerikës këtë vit – provojnë se edhe kombet më të pasura nuk janë imune ndaj këtyre ndryshimeve.
Por, për ekspertët, edhe pse ndryshimet klimatike përbëjnë pa dyshim një “kërcënim ekzistencial ndaj botës sonë”, nuk është ende vonë për të ndërmarrë veprime të vendosura.
“Duke ndërmarrë hapa të fortë ambiciozë tani për të reduktuar gazrat serrë dhe për të ndërtuar një mekanizëm ligjor ndërkombëtar për të mbrojtur refugjatët e klimës, ne do të mbronim më të varfrit dhe më të prekurit në shoqërinë tonë globale. Me këto ne do të ndërtonim pajtim, do të përfitonim ekonomikisht dhe do të ndërtonim një të ardhme më të sigurtë për planetin. Ndryshimet klimatike nuk presin. As njerëzit. Për refugjatët e klimës, e nesërmja mund të jetë shumë vonë”.
Përgatiti: Juli Prifti – /tesheshi.com/
