Nga Blendi Gashi
Kuvendi i Kosovës në mënyrën më të keqe të mundshme ka nisur sezonin vjeshtor. Seanca plenare e 17 shtatorit është kthyer në një arenë konfrontimi mes mazhoranës dhe partive opozitare.
Mosraportimi i kryeministrit Isa Mustafa për marrëveshjet e fundit të arritura me Serbinë në Bruksel, edhe pse vetë kishte bërë kërkesë për një gjë të tillë, ka çuar në bllokimin e punës së Parlamentit.
Tri partitë opozotare, ‘Vetëvendosje’, AAK dhe Nisma, nuk kanë lejuar që kjo seancë të shtyhet më datë 22 shtator, kërkesë kjo e mazhorancës. Për vazhdimin e kësaj seance do të vendos të hënën Kryesia e Kuvendit.
Pas asaj që ndodhi në seancën e së enjtes, ka reaguar Instituti Demokratik i Kosovës (KDI), e cila kundërshton fuqishëm rrjedhën e kësaj seance.
KDI ka kërkuar nga Qeveria të jetë më e përgjegjshme, kurse nga opozita që të ndërpresë bllokimet e punës së Parlamentit. 
“Kërkesa e Kryeministrit për tërheqje nga rendi i ditës i Raportimit për Marrëveshjet me arsyetimin se nuk është i pranishëm edhe zëvendëskryeministri, z. Thaçi, paraqet shmangie nga përgjegjësia e kryeministrit për obligimet kushtetuese që ka ndaj Kuvendit. Veprim është vazhdimësi e shpërfilljes së Qeverisë ndaj Kuvendit në raport me të gjithë procesin e dialogut me Serbinë. Në përgjithësi, Qeveria ka pasur një komunikim të çakorduar dhe përjashtues ndaj publikut për marrëveshjet e fundit. Ky çakordim tanimë po transferohet edhe në relacion me Kuvendin. Përkundër papërgjegjësisë nga ana e ekzekutivit, bllokimi i seancës paraqet degradim i institucionit më të lartë përfaqësues në vend. Pengimi fizik i zhvillimit të seancës paraqet një praktikë të keqe parlamentare, madje çon edhe në bllokim të funksionalizmit të Kuvendit. Subjektet opozitare do duhej të ishin më konstruktivisht të përfshira karshi procesit të negociatave me Serbinë që Kuvendi i Kosovës vetëm e ka ratifikuar”, vlerëson KDI.
Njohësi i rrethanave politike në vend, Florim Zeqa, ka thënë për ‘Te Sheshi’, se seanca e parë vjeshtore e 17 shtatorit 2015 i vërtetoi dy gjëra; fuqinë politike të Hashim Thaçit dhe paaftësinë e Isa Mustafës për të qeverisur me vendin.
“Qeveria e Isa Hashës, me veprimet e fundit ka dëshmuar se nuk është produkt i votës qytetare, por produkt i krimit të organizuar, korrupsionit dhe kontrabandimit ndërkombëtar për finalizimin e bisedimeve të Brukselit për realizimin e interesave të Serbisë në Kosovë. Mosprezenca e Isa Mustafës në seancën e fundit të Kuvendit të Republikës së Kosovës i ngjetë një fëmiu frikacak që nuk guxon të hyjë në Odë të burrave pa prezencën e tutorit (prindit, vëllaut apo një mbështetësi tjetër),…në këtë rast Hashim Thaçit. Është Qeveria ajo që duhet të ndryshoj qasjen e saj ndaj Kuvendit pse jo edhe ndaj deputetëve të opozitës, përfaqësues të shumicës shqiptare në vend. Në anën tjetër dukuria e pengimit fizik të seancës nga opozita është degradim akoma më i madhë i institucionit më të lartë përfaqësues në vend, e cila në asnjë rrethanë nuk guxon të perseritet në të ardhmën në Kuvendin e Republikës së Kosovës”, ka deklaruar Zeqa.
Analisti politik, Blerim Burjani, ka deklaruar për portalin ‘Te Sheshi’, se të dy palët, pozita dhe opozita janë përgjegjëse për gjendjen aktuale në punën e Kuvendit, e sidomos Qeveria, pasi kryeministri dhe ministrat po mungojnë në seanca plenare.
“Ideja e kryeminsitrit me shty takimin raportues nuk kishte ndonjë bazë të fuqishme dhe nuk kishte ndonjë arsyetim shumë të bazuar, përderisa opozita ka mangësitë se kërkon të shprehë revoltë dhe mundësi të prodhimit të dhunës. Këto veprime nuk tolerohen në demokraci. Opozita ka vota dhe përgjegjësi dhe nuk mundet tërë fajin ta hedh te pozita. Opozita nuk ka kërkuar të jetë e përfaqësuar në dialog por vetëm ka heshtur dhe kur është arritur ndonjë marrëveshje ka reaguar ndonjëherë dhunshëm dhe pa nivel demokratik”, ka deklaruar Burjani.
Analisti tjetër, Faik Krasniqi, ‘fërkimet’, e ndodhur në seancën e parë vjeshtore të Kuvendit i quan show të deputetëve para qytetarëve se kinse për parime po përplasen.
“Normal që kryeministri dhe ministrant janë përgjegjës, dhe se kjo Qeveri duhet të largohet nga pushteti sa më parë, por për ta shpëtuar këtë vend nga këta mafiozë e kriminelë, Kosovës për një mandat i duhet një Qeveri e shpëtimit kombëtar, nga njerëz të dijes, nga shoqëria civile, mediat, bota akademike dhe nga qytetarë të ndershëm të këtij vendi, për ta zhvilluar Kosovën dhe vënë shtetin në binarë!”, ka deklaruar Krasniqi për ‘Te Sheshi’.
